Shıgeo Katsý Nazarbaev Ýnıversıtetiniń basshylyǵynan nelikten ketip jatqanyn aıtty

ASTANA. QazAqparat - Nazarbaev Ýnıversıtetiniń prezıdenti laýazymynan ketip jatqan Shıgeo Katsý óz sheshimine qatysty túsinik berdi, dep habarlaıdy QazAqparat tilshisi.

Búgin Astana halyqaralyq forýmynda Shıgeo Katsý tilshiler suraǵyna jaýap berdi. Osy oraıda ol Nazarbaev Ýnıversıtetiniń Qamqorshylyq keńesiniń múshesi retinde qalatynyn aıtty.

«Men osynda qalamyn. Atap aıtqanda, oqý ornyndaǵy ózge de keńesterde qyzmetimdi jalǵastyramyn», - dedi Katsý.

JOO basshysy sonymen qatar laýazymynan ne sebepti ketip jatqanyn túsindirdi.

«13 jylǵa jýyq osy laýazymda qyzmet atqardym. Osyǵan deıin júzege asyrmaı, keıinge qaldyrǵan biraz jumysym bar edi, bul josparymdy iske asyrýǵa kirisemin», - dedi Shıgeo Katsý.

Nazarbaev Ýnıversıtetiniń resmı saıtynda 2023 jyldyń 15 maýsymynan prezıdent Shıgeo Katsý otstavkaǵa ketetini jarııalanǵan bolatyn.

«Prezıdenttik qyzmetinen ketkennen keıin Shıgeo Katsý Nazarbaev Ýnıversıtetiniń Qamqorshylyq keńesiniń múshesi, sondaı-aq Nazarbaev Zııatkerlik mektepteri, Nazarbaev Qorynyń Qamqorshylyq keńesiniń múshesi jáne Joǵary qamqorshylyq keńesiniń múshesi retinde qyzmetin jalǵastyrady», - delingen málimette.

Ǵylym jáne joǵary bilim mınıstri Saıasat Nurbek Astana halyqaralyq forýmynyń kýlýarynda Nazarbaev Ýnıversıtetin qandaı ózgerister kútip turǵanyn aıtty.