Shyǵarmashylyq jáne tildik mamandyq boıynsha doktorantýraǵa túsý talaptary ózgertildi
ASTANA. KAZINFORM — Bul týraly Májilis depýtaty Ashat Aımaǵambetov áleýmettik jelidegi paraqshasynda aıtty.
— Depýtattyq saýalda doktorantýraǵa túsýshilerge qoıylatyn talaptardy qaıta qaraý máselesin kótergen edim. Qoldanystaǵy erejelerge sáıkes, mamandyǵyna qaramastan, barlyǵyna aǵylshyn tilin biletinin rastaıtyn sertıfıkat (IELTS jáne t. b.) mindetti bolatyn.
Árıne, ǵylymda aǵylshyn tiliniń mańyzy zor. Degenmen, qazaq fılologııasy nemese mýzyka salasyndaǵy talantty zertteýshilerdiń ǵylymı eńbekteri aǵylshyn tilin tereń meńgerýdi talap etpese de, tek shet tili sertıfıkatynyń joqtyǵynan doktorantýraǵa túse almaı júrgen jaǵdaılardy kórdik.
GPT men Gemini sııaqty quraldar shyqqanǵa deıin bul talaptar oryndy bolsa, qazir jaǵdaı ózgerdi. Saýalymda bul máselege saralanǵan (dıfferentsıaldy) tásil qoldanýdy usyndym, — dedi ol.
Ol Ǵylym jáne joǵary bilim mınıstrligi bul bastamany qoldaǵanyn aıtty.
- Mınıstrdiń № 490 buıryǵymen úlgilik erejelerge ózgerister engizildi, - dedi ol.
Endi myna bilim berý baǵdarlamalarynyń toptary boıynsha oqýǵa túsý úshin shet tilin meńgergenin rastaıtyn sertıfıkat talap etilmeıdi.
1. D005 — Dene shynyqtyrý pedagogterin daıarlaý;
2. D006 — Mýzyka pedagogterin daıarlaý;
3. D017 — Qazaq tili men ádebıetiniń pedagogterin daıarlaý;
4. D018 — Orys tili men ádebıetiniń pedagogterin daıarlaý.
— Sonymen qatar, saýalymda úmitkerdiń shynaıy ǵylymı áleýetin baǵalaý úshin túsý kezinde esse jazýdyń ornyna Research Proposal (zertteý jospary) daıyndaýdy engizýdi usynǵan bolatynmyn. Mınıstrlik bul usynystyń qabyldanǵanyn habarlady. Research Proposal engizý jáne táýelsiz sarapshylardy tartý normasy 2026-2027 oqý jylynan bastap iske qosylady dep josparlanyp otyr.
Degenmen, Scopus boıynsha talaptardy ózgertý, tizimdi basqa da shyǵarmashylyq baǵyttarǵa keńeıtý, til emtıhanyn tapsyrý merzimin oqý sońyna aýystyrý (talapty múldem alyp tastamaı) jáne irikteý protsesinde akademııalyq adaldyqty kúsheıtý sııaqty júıeli usynystarym ázirge júzege aspady. Doktorantýraǵa qabyldaý talaptary men baǵdarlamalardyń ózin jetildirý boıynsha sharalardy ári qaraı qarastyrý mańyzdy, — dedi Ashat Aımaǵambetov.
Aıta ketelik bıyl elde sheteldik 7 JOO-nyń fılıaly jumysyn bastady.