Shyǵarmashylyq sýbektilerine salyq jeńildetildi

Elimizde shyǵarmashylyq sýbektileri endi biryńǵaı salyqty ǵana tóleıdi. Bul týraly Mádenıet jáne aqparat mınıstri Aıda Balaeva Facebook paraqshasynda jazdy, dep habarlaıdy Kazinform.

«Memleket basshysynyń kreatıvti ındýstrııany damytý jónindegi tapsyrmasyn oryndaý maqsatynda Ulttyq ekonomıka jáne Qarjy mınıstrlikterimen birge keshendi jumys júrgizdik. Negizgi maqsatymyz shyǵarmashylyq sýbektilerine salyqty jeńildetý bolatyn. Osy keshendi jumystyń nátıjesinde Úkimet (QR ÚQ #1240 29.12.2023j.) qaýly qabyldady. Qaýlyǵa sáıkes 40 qyzmet túri arnaıy bólshek salyq rejımine ótti. Bul degenimiz bıznes KTS, jeke tabys salyǵy, QQS tóleýden bosatylǵanyn bildiredi. Atalǵan qyzmet túrlerimen aınalysatyn sýbektiler endi biryńǵaı salyqty ǵana tóleıdi. Bul jeke kásipkerler úshin 2 paıyzdan 4 paıyzǵa deıin, JShS úshin 8 paıyzǵa deıin bolady. Tek kompanııanyń jyldyq aınalymy 2,2 mıllıard teńgeden aspaýy, al shtatta 200 adamnan kóp bolmaýy qajet», — dedi mınıstr.

Onyń atap ótýinshe, salyqty jeńildetý kıno, beınekontent pen telebaǵdarlamalardy óndirýge jáne odan keıingi óndiriske, mýzykalyq shyǵarmalarǵa dybys jazý men basyp shyǵarýǵa, teatr jáne mýzeı ónerine, sáýlet jáne dızaınǵa, qolóner buıymdaryna, halyq shyǵarmashylyǵyna jáne kádesyılar óndirisine áser etedi.

«Osy qoldaý sharasyn ázirleý barysynda halyqaralyq tájirıbeni muqııat taldaǵanymyzdy atap ótkim keledi. Eń ozyq elderdiń (Ulybrıtanııa, Germanııa, Ońtústik Koreıa) tájirıbesi kreatıvti ındýstrııany damytý úshin salyqty jeńildetýge erekshe mán berý kerektigin kórsetedi. Atalǵan jumys salany aýqymdy damytýǵa baǵyttalǵan alǵashqy qadamdardyń biri. Bul osy saladaǵy ıgilikti bastamalardyń biri dep bilemiz», — dep atap ótedi Aıda Balaeva.