Shıfrlaý quraldary týraly málimetter memlekettik qupııalarǵa jatatyn bolady - Senat
ASTANA. 5 sáýir. QazAqparat -Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine qorǵalǵan baılanys máseleleri boıynsha ózgerister men tolyqtyrýlar engizý týraly» zańyn qabyldady.
Atalǵan qujattyń maqsaty shıfrlaý jumysyn júzege asyrý jáne úkimettik baılanysty qamtamasyz etý kezinde týyndaıtyn qoǵamdyq qatynastardy retteý bolyp tabylady. Bul rette zań jobasy shıfrlaý quraldary týraly málimetterdi memlekettik qupııalarǵa jatqyzýdy, shıfrlaý jumysy, shıfrlanǵan, qupııalandyrylǵan jáne kodtalǵan baılanys sekildi birqatar uǵymdardy aıqyndaýdy kózdeıdi. Sonymen qatar, QR Ulttyq qaýipsizdik komıtetiniń shıfrlaý jumysyn uıymdastyrý, úkimettik baılanysty qamtamasyz etý tártibin ázirleý jónindegi ókilettigi, sondaı-aq QR Prezıdentiniń ony bekitý jónindegi ókilettigi qamtylady. «Memleket basshysynyń shıfrlaý jumystaryn bekitýge, úkimettik baılanystardy qamtamasyz etý tártibin bekitýge qatysty ókilettigi aıqyndalady», - deıdi QR UQK tóraǵasynyń orynbasary Óser Mızanbaev.
Parlament qabyldaǵan zań Memleket basshysynyń qol qoıýyna jiberiledi.
