Shıelide jaıylymnan mal urlaǵan kúdikti ustaldy
QYZYLORDA. QazAqparat - Qyzylorda oblysy Shıeli aýdanynda jaıylymnan 6 bas sıyr urlaǵan jergilikti turǵyn ustaldy, dep habarlaıdy QazAqparat tilshisi.
Búgingi kúnderi oblysta elimizdiń ishki ister mınıstrliginiń 2019-2020 jyldarǵa arnalǵan «Urlyqqa qarsy is-qımyl» baǵdarlamasynyń talaptaryn oryndaý maqsatynda tıisti is-sharalar qolǵa alyndy. Osy maqsatta Shıeli aýdandyq polıtsııa bólimi boıynsha mobıldik toptar qurylǵan.
«Aýdan kóleminde júrgizilgen reıd barysynda mal tasymaldaý deregi anyqtaldy. Shıeli kentinde toqtatylǵan «GAZel» avtokóliginen alty sıyr maly esh qujatsyz tasymaldaǵany anyqtaldy. Tekserý barysynda atalǵan sıyrlar Y.Jaqaev aýylyna qarasty egistik alqapta óz betterinshe jaıylyp júrgen jerinen urlanǵan maldar bolyp shyqty», dep málim etti Qyzylorda oblystyq polıtsııa departamentiniń baspasóz qyzmeti.
Vedomstvonyń málimetinshe, osy qylmysqa qatysy bar kúdikti 43 jastaǵy aýdan turǵyny ustaldy. Atalǵan derek boıynsha QR Qylmystyq kodeksiniń 188-1 babynyń 1 bóligimen (mal urlaý) sotqa deıingi tergep-tekserý amaldary júrgizilýde.
