Shıelide qus fermasy iske qosylady - Qyzylorda oblysy
QYZYLORDA. QazAqparat - Shıeli aýdanynan 11 myń qusqa arnalǵan qus fermasy iske qosylatyn bolady. Qurylys jumystary aıaqtalǵan fermada búginde qajetti qural-jabdyqtary ornatylýda. Qus fermasy iske qosylǵannan keıin jylyna 5 mln. dana jumyrtqa, 11 tonna qus eti óndirilip, 6 adam turaqty jumyspen qamtylýy josparlanyp otyr. Bul týraly aýdan ákimi Qaıratbek Áýbákiruly óńirdegi buqaralyq aqparat quraldary ókilderi men ótkizilgen baspasóz máslıhatynda baıandady,-dep habarlady QazAqparat tilshisi.
Sondaı-aq, aýdan da kásipkerlik baǵytta munan ózge de jańalyqtar barshylyq. Solardyń biri, «Asylhan» sharýa qojalyǵynyń 200 bas iri qara malyna arnalǵan sútti taýarly fermasy. Búginde qurylys jumystary tolyq aıaqtalǵan sút fermasynda synaq jumystary júrgizilýde. Ferma tolyq iske qosylǵannan keıin, táýligine 3 tonnaǵa deıin sút alynyp sút, aıran, qaımaq, kilegeı, sary maı ónimderi shyǵarylatyn bolady.
Jalpy, qazirgi tańdaǵy dúnıejúzilik daǵdarys jaǵdaıyna qaramastan Shıeli aýdanynyń áleýmettik-ekonomıkalyq damý deńgeıi oń kórsetkishterge qol jetkizýde. Bıylǵy jylǵa arnalǵan aýdandyq bıýdjet jyl basynda 10 mlrd. 532 mln. teńge kóleminde bekitilip, jyl kóleminde bıýdjetti arttyrý baǵytyndaǵy atqarylǵan jumystardyń oń nátıjesinde aýdandyq bıýdjet 10 aıdyń qorytyndysymen 15 mlrd. 200 mln. teńgeni qurap, 44 paıyzǵa artqan.
