Shıelide kópir salynady
QYZYLORDA. QazAqparat - Shıeli aýdanynyń Eńbekshi aýylynda «Batys Eýropa - Batys Qytaı» avtomagıstralinde kópir salynady, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Bul týraly Qyzylorda oblysynyń ákimi Qyrymbek Kósherbaev pen «Qazatomónerkásip» UAK» AQ basqarma tóraǵasy Ǵalymjan Pirmatovtyń qatysýymen ótken májiliste belgili boldy.
Oblys ákimi Qyrymbek Kósherbaev «Qazatomónerkásip» UAK» AQ-men áriptestikti damytý boıynsha birqatar usynystaryn aıtty. Aımaq basshysy Reseıdiń tehnıkalyq joǵary oqý oryndarynda oqýyn támamdaǵan jergilikti jas mamandarǵa, sondaı-aq «Qazatomónerkásip» UAK» AQ-nyń bilim berý granttary boıynsha bilim alǵan mamandarǵa arnalǵan jaǵdaılardy qarastyrýdy usyndy. Sondaı-aq, Shıeli aýdany, Eńbekshi aýylynda «Batys Eýropa - Batys Qytaı» avtomagıstralinde kópir salý úshin bıznestiń áleýmettik jaýapkershiligi aıasynda qarajat bólý kerektigin atap ótti.
«Jaqynda Qyzylorda qalasynda iri jol-kólik oqıǵasy boldy. Jeńil avtokólik qum tıelgen júk kóligine soqtyǵysyp, nátıjesinde tórt adam kóz jumdy. Bul júk kóligi hımııalyq zattar nemese kúkirt qyshqylyna toly bolsa qandaı jaǵdaı bolar edi? Sondyqtan bıznestiń áleýmettik jaýapkershiligi aıasynda kópir salý úshin qarajat bólý múmkindigin qarastyrýdy usynamyn», - dedi Q.Kósherbaev.
Óz kezeginde, «Qazatomónerkásip» UAK» AQ basqarma tóraǵasy Ǵalymjan Pirmatov qorshaǵan ortany qorǵaý jáne qaýipsizdik máseleleri kompanııa úshin mańyzdy bolyp tabylatynyn, sol sebepti kópirdiń qurylysy boıynsha sharalardy qolǵa alýǵa daıyn ekenin aıtty.
«Túlekterdi jumysqa ornalastyrý jaıyndaǵy usynysyńyzǵa qatysty aıtarym, bizge qajetti mamandar bolsa, olardy jumysqa qabyldaýǵa ázirmiz»,-dedi «Qazatomónerkásip» basshysy.
