Shıeli aýdanynda karantın talaptary kúsheıtiledi
Shıeli aýdanynda koronavırýs ınfektsııasy boıynsha sońǵy 7 kún ishinde syrqattaný deńgeıi 7%-dan asyp ketkendikten, epıdemıologııalyq ahýal turaqsyz bolyp baǵalanyp otyr. Osyǵan oraı koronavırýs ınfektsııasynyń aldyn alý jáne taralýyna jol bermeý maqsatynda shekteý jáne karantın sharalary kúsheıtiletin boldy.
«Búgingi tańda Shıeli aýdany boıynsha koronavırýs ınfektsııasyn juqtyrýshylar sany 101-ge jetip otyr. Bul karantın erejelerin jeńildetýdiń saldarynan oryn aldy. Osyǵan oraı, Qyzylorda oblystyq Bas sanıtarııalyq dárigeriniń №15 jáne Shıeli aýdandyq Bas sanıtarııalyq dárigeriniń №9 arnaıy bektilgen qaýlylaryna sáıkes, karantın talaptary qaıta kúsheıtilýde. Aýdan turǵyndary qarapaıym gıgıenalyq normalardy saqtaýdy umytpaı, qoǵamdyq oryndarda, azamattar kóp shoǵyrlanatyn jerde mindetti túrde medıtsınalyq maska taǵýy qajet. Ásirese balalarǵa túsindirip, otbasymyz ben jumysymyzda da osy tártipti saqtaýymyz qajet», - dedi Shıeli aýdanynyń ákimi Qambarbek Múbarakov.
Endigi kezekte aýdan kóleminde kópshilik is-sharalardy ótkizýge tyıym salynady. Olardyń qatarynda merekelik, sporttyq-kópshilik, oıyn-saýyq, mádenı-kópshilik is-sharalardy, konferentsııalar, semınarlar jáne ózge de sharalar bar. Sondaı-aq, ujymdyq, otbasylyq (týǵan kún, úılený toıy, qudalyq, as berý,basqa da dástúr men ádet-ǵuryp sharalary, t.b.) barlyq jıyndarǵa tyıym salý jalǵastyrylady. Bilim berý ortalyqtary, úıirmeler, qosymsha bilim berý ortalyqtarynyń jumysy shekteýli merzim boıynsha júrgiziledi. Oǵan qosa menshik nysanyna qaramastan úı-jaılardaǵy balalar oıyn alańdarynyń, kınoteatrlar, fýtkordtar jáne táýliktiń páterler men úılerdi jalǵa berý-alý qyzmetterine tyıym salý nazarda bolady.
Qazir Qyzylorda oblysynda 533 adam koronavırýs ınfektsııasyn juqtyrǵany anyqtaldy. Onyń 475-i aýrýynan jazylyp shyqty.