Shıeli aýdandyq ishki ister bóliminiń qyzmetkeri para bopsalaǵany úshin úsh jylǵa bas bostandyǵynan aıyryldy - Qyzylorda oblysy
QYZYLORDA. 19 sáýir. QazAqparat /Jańagúl Serdaly/ - Qyzylorda oblystyq prokýrorynyń kómekshisi Batyrbek Nurmaǵanbetov Shıeli aýdandyq ishki ister bólimi ýchaskelik ınspektorynyń kómekshisi A.Qyrdanov qyzmet babyn paıdalanyp, kásipker áıelden para suraǵany úshin sot júzinde jaza alǵanyn málimdedi.
Inspektor kómekshisi jol boıyndaǵy kafe janynda KamAZ júrgizýshisiniń basqa ydysqa benzın quıyp alyp jatqanyn kórip, osydan ózine paıda tappaq bolady. Ol kafe ıesi kásipker áıelden osy «tártip buzýshylyqty jabý úshin» ózine 50 myń teńge berýdi talap etedi. Buǵan áıel 30 myń teńge ǵana bere alatynyn aıtyp jaýap beredi. Kelesi kúni tártip saqshysy bes myń teńge alyp, qalǵan aqsha úshin sosyn keletin bolady. Al áıel osydan keıin ishki ister basqarmasynyń qaýipsizdik qyzmetine shaǵymdanady. Sondyqtan paraqor jigit qalǵan aqshany alyp jatqanda qolǵa túsedi.
Shıeli aýdandyq soty A.Qyrdanovtyń áreketin úsh jylǵa jalpy tártip boıynsha sottalýǵa laıyqty dep baǵalady.
