Shıelide kásipkerge 75 mln teńge qaryz óteldi

ASTANA. KAZINFORM – Qyzylorda oblysy Shıeli aýdanynda prokýrorlyq qadaǵalaý nátıjesinde kásipkerdiń buzylǵan quqyǵy qalpyna keltirilip, tólenbeı qalǵan qarjysy óndirildi.

Aýdandyq prokýratýra memlekettik satyp alý salasyndaǵy zańnamanyń saqtalýyna júrgizgen taldaý barysynda qurylys, sáýlet jáne qala qurylysy bólimi tarapynan kásipkerge tıesili qarajattyń ýaqtyly tólenbegenin anyqtaǵan.

– Bólim men «Aksar Stroı» JShS arasynda 2025 jylǵy 28 shildede «Janseıit eldi mekenine ishki gaz taratý jelilerin salý» boıynsha 180 mln teńgege kelisimshart jasalǵan. Jumystar tolyq oryndalyp, nysan paıdalanýǵa berilgenine qaramastan, kásipkerge 105 mln teńge ǵana tólenip, 75 mln teńge bereshek keshiktirilgen. Prokýrorlyq qadaǵalaý aktisi engizilip, nátıjesinde kásipkerge tıesili qarajat tolyq óndirildi, – delingen prokýratýra habarlamasynda.

Vedomstvo málimetinshe, qabyldanǵan sharalar kásipkerlerdiń quqyqtaryn qorǵaýǵa jáne memlekettik organdardyń mindettemelerin ýaqtyly oryndaýyna baǵyttalǵan.

Aıta keteıik, Qyzylordada 10 jyl boıy bıýdjet qarajatyn jymqyrǵan býhgalterge qatysty úkim shyqty.