Shıeli balabaqshasynda 1,5 jastaǵy balanyń denesi 25 ret tistelgen
QYZYLORDA. KAZINFORM - Áleýmettik jelide Qyzylorda oblysy Shıeli aýdanyndaǵy balabaqshalardyń birinde 1,5 jastaǵy qyz balanyń denesi tistelgeni týraly aqparat tarady.
– Tárbıeshiniń kómekshisi syrtqa gorshok tógýge ketip, balalar jalǵyz qalady. «Sol ýaqytta bolǵan jaǵdaı» depti balabaqsha basshylyǵy. 1,5 jasar qyzdy 1 jas 3 aıdan asqan bala tistegenin aıtqan. Kishkentaı balanyń 25 ret jalǵyz ózi tistep, osyndaı zalal ákelýi qısynǵa soqpaıdy. Saǵat 12-de bolǵan soraqylyqty keshke deıin ata-anasyna aıtpaý, alǵashqy medıtsınalyq kómek kórsetpeý úshin qanshalyqty jaýyz bolý kerek? Beınekamera bolǵanymen aıaqasty ashpaı, istemeı qalypty. Іstemeıtin kamera nege kerek? Ol kezde tárbıeshiniń ózi qaıda? Kómekshi nege tastap ketedi balany? Negizi zań boıynsha balaǵa tárbıeshi qaraý kerek, kómekshi emes. Bul 1-2 mınýtta bolǵan jaǵdaı emes, kemi jarty saǵat ýaqyt alady. Sonda shyrqyrap jylaǵan balaǵa bir adamnyń kelip qaramaǵany ma? - delingen Facebook pen Instagram áleýmettik jelisiniń «Krıtıka Qyzylorda» paraqshasynda.
Sondaı-aq jazba avtory balabaqshany tolyq tekserýdi, ata-anaǵa tıisti kómek kórsetýdi, jaýapsyz qyzmetkerlerdi ornynan bosatýdy talap etken.
Bul máselege baılanysty Shıeli aýdandyq bilim bólimi jaýap berdi.
– Jaǵdaıǵa baılanysty Shıeli aýdany boıynsha bilim bóliminiń 2025 jyldyń 30 sáýiri №32 buıryǵyna sáıkes máseleni zerdeleý maqsatynda arnaıy jumysshy toby quryldy. Top tárbıeshisi jáne tárbıeshiniń kómekshisin jumystan shettetý boıynsha usynys berildi. Másele Shıeli aýdany boıynsha bilim bóliminiń qatań baqylaýynda bolady, - delingen resmı jaýapta.
Al aýdandyq polıtsııa bólimi osy jaǵdaıǵa baılanysty shara qoldanylǵanyn atap ótti.
– Balabaqsha tárbıeshisine kámeletke tolmaǵan adamnyń qaýipsizdigin qamtamasyz etpegeni úshin shara qoldanyldy. Sonymen birge Qyzylorda oblysynyń Bilim basqarmasyna tıisti usynys joldandy. Qazir polıtsııa bóliminiń ıývenaldy polıtsııa tobynyń qyzmetkerleri profılaktıkalyq baǵytta túsindirme jumystaryn júrgizip jatyr, - dep jaýap berdi.
Buǵan deıin Shıeli aýdanynda 8-synyp oqýshysyn mektep oqýshylary zorlaǵany týraly aqparatty quzyrly oryndar rastady.