Shıeli aýdanynda dene shynyqtyrý-saýyqtyrý kesheni ashyldy
QYZYLORDA. KAZINFORM - Oblys ákimi Nurlybek Nálibaev Shıeli aýdanyna jumys sapary barysynda Ybyraı Jaqaev aýylyndaǵy dene shynyqtyrý-saýyqtyrý kesheniniń ashylýyna qatysty. Bul týraly Qyzylorda oblysy ákimdiginiń baspasóz qyzmeti habarlady.
Saltanatty jıynǵa Parlament Senaty janyndaǵy Senatorlar keńesiniń múshesi Murat Baqtııaruly, oblystyq máslıhat tóraǵasy Murat Tileýimbetov, zııaly qaýym ókilderi, jaýapty sala basshylary men aýyl turǵyndary keldi.
Aımaq basshysy jurtshylyqty merekemen quttyqtap, jańa nysannyń el ıgiligine qyzmet etetinine senim bildirdi.
— Prezıdentimiz Qasym-Jomart Kemeluly «Buqaralyq sportty damytý arqyly biz kásibı sportqa jol ashamyz jáne eń bastysy, ult saýlyǵyn jaqsartamyz» degen bolatyn. Bul baǵytta oblys turǵyndarynyń sportpen shuǵyldanýyna qolaıly jaǵdaı jasalyp jatyr.
Ótken jyly qazan aıynda Qyzylorda qalasynda «Ústel tennısi» ortalyǵy paıdalanýǵa berildi. Halyqaralyq standarttarǵa sáıkes keletin 11 myń oryndyq Ortalyq stadıon salynyp jatyr. Nysan aldaǵy mamyr aıynda el ıgiligine tabystalady. Jaqyn kúnderi Qyzylorda qalasynda kópbeıindi «Qyzylorda Arena», dene shynyqtyrý-saýyqtyrý keshenderiniń qurylysy bastalady.
Jyl basynan beri Qarmaqshy aýdanyndaǵy ІІІ Internatsıonal, Dúr Ońǵar eldi mekenderinde, Syrdarııa aýdanynyń Besaryq aýylynda jańa keshender qoldanysqa berildi. Dál osyndaı sport kesheni erteń eki aýdanda ashylady. Búgin Ulystyń uly kúni qarsańynda Ybyraı Jaqaev aýylyndaǵy jańa sport kesheniniń ashylý saltanatyna jınaldyq. Jańa sport ǵımaraty qutty bolsyn! Barshańyzdy jyl basy — Naýryz meıramymen shyn júrekten quttyqtaımyn! Ulys oń bolsyn! Aq mol bolsyn! , — dedi Nurlybek Nálibaev.
Rásimde Shıeli aýdanynyń damýyna úles qosqan belsendi azamattar oblys ákiminiń Alǵys hatymen marapattalyp, Qyzylorda oblysynyń qurmetti azamaty Ibragım Ábıbýllaev batasyn berdi.