Sheıh Muzafar Shýkor: Ǵaryshta Qazaqstannyń ýaqytymen namaz oqydym
ASTANA. 24 mamyr. QazAqparat - Malaızııalyq astronavt, doktor Sheıh Muzafar Shýkor ǵaryshta bolǵan toǵyzynshy musylman. Ol ǵaryshta qalaı qulshylyq etýge bolatynyn kórsetip berdi.
«Árkim ǵaryshqa ushqanda áıteýir bir ǵajaıyp dúnıege kezigedi. Ǵaryshtaǵy saparym qasıetti Ramazan aıymen tuspa-tus kelip, sapar kezinde ǵarysh stansasynan azannyń daýsyn estidim», - dedi ol Anatolia aqparat agenttigine bergen suhbatynda.
«Oraza men ǵıbadat ýaqyty ǵaryshtyń qaı tusynda bolǵanyńyzǵa baılanysty. Ǵarysh kemesi Qazaqstannan ushyrylǵandyqtan biz osy eldiń ýaqytyn basshylyqqa aldyq. Men bes ýaqyt namazymdy osy eldiń ýaqytymen oqydym. Al júzimizdi Jerge, ıaǵnı Mekke tarapyna burýyńyz kerek. Al bizdiń ǵarysh stansamyz júzińdi Jerge qaratýǵa bolatyndaı baǵytta turdy», dedi ol sózin tolyqtyryp.
muslim.kz saıtynyń jazýynsha, budan basqa olar ǵarysh keńistiginde obyr jasýshasymen jumys istegen. Olar tájirıbeniń 80 paıyzyn aıaqtaǵan kórinedi. «Nátıjesin keıin aıtatyn bolamyz», - dedi ol sóziniń sońynda.
