Sheıh Muhammed Nursultan Nazarbaevqa: Sizdi úlken aǵamyz sanaımyz

ASTANA. QazAqparat - Qazaqstan men Birikken Arab Ámirlikteri arasyndaǵy qarym-qatynasty jandandyra túsý qajet. Bul týraly búgin Aqordada Elbasy Nursultan Nazarbaevpen kelissózder ótkizgen Ábý Dabıdiń murager hanzadasy sheıh Muhammed ben Zaıd ál Nahaıan aıtty, dep habarlaıdy QazAqparat tilshisi.

«Biz sizdi úlken aǵamyz dep sanaımyz. Sizdiń úlken tájirıbeńiz bar. Qazaqstanda oryn alyp jatqan ózgeristerdi osydan otyz jyl buryn bulaı bolady dep eshkim de oılaǵan emes. Al Qazaqstan osy aımaqtaǵy eń mańyzy, eń bedeldi memleketke aınaldy. Bul sizdiń kemeńger saıasatyńyzdyń jemisi», - dedi ol.

Murager hanzada eki el arasyndaǵy qarym-qatynastardy odan ary jandandyra túsirý qajettigine de toqtaldy.

«Sebebi bizde aıryqsha qarym-qatynas ornaǵan. Ózińizge uzaq ǵumyr, zor densaýlyq, elińizge turaqtylyq jáne odan ary damý men órkendeý tileımiz. Biz, ámirliktegi baýyrlaryńyz qandaı qoldaý qajet etseńiz, ony oryndaýǵa daıynbyz. Siz ámirlikterge jıi kelesiz jáne sizdiń ár saparyńyz biz úshin úlken qýanysh», - dedi sheıh Muhammed ben Zaıd ál Nahaıan.