Sheıh Hasına ólim jazasyna qatysty úkimge endi shaǵymdana almaıdy
ASTANA. KAZINFORM — Bangladeshtiń burynǵy premer-mınıstri Sheıh Hasına ólim jazasyna qatysty sot úkimine shaǵymdaný múmkindiginen aıyryldy. Ol zańda belgilengen 30 kún ishinde apellıatsııa bermegen.
Anadoly agenttigi jazǵandaı, bul týraly Bangladeshtegi Halyqaralyq qylmystyq trıbýnaldyń bas prokýrory Amınýl Islam málimdedi.
Onyń aıtýynsha, Sheıh Hasına men basqa da sottalǵandar belgilengen 30 kúndik merzimde apellıatsııa bermegendikten, endi olarǵa úkimge shaǵymdaný úshin qosymsha ýaqyt berilmeıdi.
— Sot ólim jazasyna kesken adamdar, onyń ishinde Sheıh Hasına da, úkim shyqqannan keıin 30 kún ishinde apellıatsııa bermese, budan bylaı oǵan shaǵymdana almaıdy. Endi úkimdi oryndaý ǵana qalady, — dedi Amınýl Islam.
Sonymen qatar prokýror Bangladesh úkimetiniń jazany toqtatýǵa nemese kúshin joıýǵa quqyǵy bar ekenin atap ótti.
Sheıh Hasına ne úshin ólim jazasyna kesildi?
2024 jylǵy shildede Bangladeshte memlekettik sektordaǵy jumys oryndaryna 1971 jylǵy Táýelsizdik soǵysyna qatysýshylardyń balalary úshin kvota engizý týraly sheshimge baılanysty stýdentterdiń jappaı narazylyǵy bastaldy.
Narazylyq kúsheıgen kezde Sheıh Hasına elden ketip, áskerı tikushaqpen Úndistanǵa barǵan. Osy ýaqytta sherýshiler premer-mınıstrdiń rezıdentsııasyna basyp kirdi.
2024 jylǵy 8 tamyzda Nobel syılyǵynyń laýreaty Muhammad ıÝnýs ýaqytsha úkimettiń basshysy retinde ant qabyldady.
Al Sheıh Hasına 2025 jylǵy qarashada syrttaı ólim jazasyna kesildi. Sot ony narazylyqtar kezinde adamdardyń qaza bolýyna jeke jaýapty dep tanyǵan. Budan bólek, oǵan sybaılas jemqorlyq boıynsha da birneshe jylǵa bas bostandyǵynan aıyrý jazasy taǵaıyndaldy.
Buǵan deıin sheteldik BAQ-qa bergen suhbatynda Sheıh Hasına Bangladeshke oralyp, sot aldynda jaýap berýge daıyn ekenin aıtqan. Ol túrmege qamalýy nemese tipti ólim jazasyna kesilýi múmkin ekenin túsinetinin málimdegen.
