«Shevron» kompanııasy 15 respýblıkalyq medıtsınalyq mekemege jańa qural-jabdyq alýǵa sertıfıkat berdi
Y. Aqpannyń 1-i. QazAqparat / Ádilet Musahaev / - Búgin «Shevron» kompanııasy «Ult densaýlyǵy úshin seriktestik» atty qaıyrymdylyq sharasy aıasynda Almaty qalasynyń 15 respýblıkalyq medıtsınalyq mekemesine qural-jabdyqtar alýǵa sertıfıkattar tabys etti,
dep habarlaıdy QazAqparat.
Bıylǵy jyly kompanııanyń dástúrge aınalǵan qaıyrymdylyq sharasy Almaty qalasynyń Densaýlyq saqtaý departamentimen birlese ótkizilgen.
«Bul sharaǵa bizdiń kompanııa 23 mıllıon teńgeden asa qarajat bólip otyr, osy qaıyrymdylyq sharasy arqasynda 15 medıtsınalyq mekeme ózderiniń mekemelerine kerekti qural-jabdyqqa qol jetkizbek. Osydan 2 jyl buryn Astanada osyndaı shara ótkizip, sondaǵy medıtsına ortalyqtaryna kómektesken bolatynbyz», deıdi «Shevron» kompanııasynyń Qazaqstandaǵy ókildiginiń basshysy Zamıra Qanapııanova.
Shara barysynda Qazaq onkologııa jáne radıologııa ǵylymı-zertteý ınstıtýtynyń balalar bólimine tósektiń joǵary jaǵynda ornalasatyn 10 konsol jıyntyǵy, operatsııadan keıingi palatalarǵa arnap ottegini rettegishter jáne ottegini ylǵaldatqyshtardyń sertıfıkaty, Pedıatrııa jáne balalar hırýrgııasynyń respýblıkalyq Ǵylymı ortalyǵyna shaǵyn narkoz apparatynyń sertıfıkaty berildi. Al «Aqsaı» Respýblıkalyq balalar aýrýhanasy magnıttik terapııa, elektrli terapııa, ýltradybysty jáne lazerli terapııa apparattaryna ıe bolady.
Tabys etý rásimin «Dara» qaıyrymdylyq qory jáne «Tańsári» balalar dýman teatry birlesip uıymdastyrdy.
