Shetten keletin jumys kúshi zańnyń osal tustaryn paıdalanyp, salyq tóleýden jaltarýda
ASTANA. 13 qyrkúıek. QazAqparat - Shetten keletin jumys kúshi zańnyń osal tustaryn paıdalanyp, salyqtan jaltaryp otyr.
Búgin QR Parlamenti Senatynyń jalpy otyrysynda Úkimet basshysynyń atyna depýtattyq saýal joldaǵan senator Ertarǵyn Astaev osylaı málim etti.
«Elimizde TMD elderinen kelgen adam sany resmı derekter boıynsha tirkelgen adam sanynan áldeqaıda joǵary ekeni belgili. Solardyń ishinde, jumysqa jaldanyp tabys tabý maqsatynda kelgen (kóbinese Ózbekstan, Qyrǵyzstan t.b.) adamdardyń tirkeýge alynbaıtyn negizgi sebebi, arzan jumys kúshin paıdalanyp, nemese saýdaǵa salyp, paıda tabýǵa mashyqtanǵan jylpos kásipkerler olardy «jolyn taýyp» shekaradan tirkeýsiz ótkizip alady. Sońynan tólqujattaryn sypyryp alyp, mardymsyz jalaqy tólep, qara jumysqa jegip qoıady nemese qurylys júrgizip jatqan jeke azamattarǵa satyp jiberedi. Osyndaı ádispen olar deldaldar arqyly bir qoldan ekinshi qolǵa ótip jatady», - deıdi E. Astaev.
Bul rette senator 2006 jylǵy «Múlikterdi jarııa etýge raqymshylyq jasaý týraly» Zańy qabyldanǵan kezde osyndaı arzan jumys kúshin paıdalanyp júrgen keıbir kásipkerler alǵashynda qaramaǵynda istep júrgen sheteldik jumysshylar úshin memleketke azyn-aýlaq tabys salyqtaryn tólep turǵanyn, alaıda, keıinnen bul zańnyń da osal tustary tabylyp, salyq tóleý tolyq toqtaǵanyn málimdedi.
«Ortalyq Azııa respýblıkalarynan aǵylyp jatqan arzan jumys kúshiniń basym bóligi olarǵa qatań talap belgilegen kórshi Reseı memleketinde mıgranttardyń árqaısysynan nemese olardy jaldaýshy kásipkerlerden 10 000 rýbl kóleminde bir jolǵy tabys salyǵyn óndirip, patent alǵan soń ǵana memleket aýmaǵyna kirýge ruqsat beredi. Sondyqtan da, kelýshiler Reseıden góri bizge úıir. Endeshe «Halyqtyń kóshi-qony týraly» zańyn tereńirek zerdelegen lázim», - deıdi E. Astaev.
