Shettegi qandastarǵa arnalǵan «Uly dala elinen» onlaın kontserti ótedi
NUR-SULTAN. QazAqparat - Dúnıejúzi qazaqtarynyń qaýymdastyǵy, «Otandastar qory» KEAQ jáne «Qazaqkontsert» uıymy birlesip, «Uly dala elinen» atty qazaqstandyq ártisterdiń kontsertin uıymdastyrady, dep habarlaıdy QazAqparat tilshisi.
QR Aqparat jáne qoǵamdyq damý mınıstrliginiń tapsyrmasymen júzege asyrylatyn kontserttiń maqsaty – mýzykalyq óner arqyly ulttyq biregeılikti saqtaý, qazaq dıasporasyna rýhanı qoldaý kórsetý, sheteldegi qandastarmen baılanysty nyǵaıtý.
«Osy ıgi joba aıasynda 22 tamyz kúni saǵat 21.00-de (Nur-Sultan ýaqyty boıynsha) álemge áıgili «TURAN» etnofolklorlyq ansambliniń onlaın kontserti ótedi. Ansambl qazaq halqynyń ulttyq mýzykalyq murasyn jańǵyrtyp, umyt bola bastaǵan tól aspaptardyń súıemeldeýimen ózderiniń úzdik týyndylaryn oryndaıdy», - delingen «Qazaqkontsert» uıymynyń baspasóz qyzmeti taratqan aqparatta.
«TURAN» ansambli ulttyq mýzykalyq aspaptardyń dybysyn qazirgi zamanǵa saı laıyqtap, jańa formatta usynyp júr. On jyldyq tarıhy bar óner ujymy qazaq mýzykasyn álemge áıgilep, 70-ten astam shet memlekette 600-den astam jeke kontsert bergen. Ansambldiń quramynda Serik Nurmoldaev, Maqsat Medeýbek, Baýyrjan Bekmuhanbetov, Erjigit Álıev, Jantý Dadabaev syndy talantty mýltı ınstrýmentalıst mýzykanttar bar. Qazaq halqynyń otyzdan astam ulttyq mýzykalyq aspaby bolsa, mýzykanttardyń árqaısysy solardyń birnesheýinde oınaýdy meńgergen.
Onlaın kontsert «Otandastar qory» KEAQ Otandastar channel YouTube arnasynyń tikeleı efırinde kórsetilip, barshaǵa qoljetimdi bolady.
