Shettegi qandastar elordamyzdyń Nur-Sultan atalýyna qoldaý kórsetýde

NUR-SULTAN. QazAqparat - Shettegi qandastarymyz elordamyzdyń Nur-Sultan qalasy dep atalýyna oraı óz pikirlerin bildirýde. Solardyń biri Mońǵolııanyń eki márte eńbek eri Qýanbaı Bapaıaquly bul jańalyqty qýana qabyldaǵandyqtaryn jetkizdi, dep habarlaıdy QazAqparat tilshisi.

«Mońǵolııadaǵy az qazaq atajurttaǵy baıtaq elimizdiń ár qadamyn baqylap, jaqsylyǵyna tilektes bolyp otyramyz. Ásirese Qazaq eline táýelsizdik áperip, nebári 28 jyldyń ishinde eki ǵasyrlyq órkenıetke jetkizgen Elbasy Nursultan Nazarbaevtyń atyn estigende mereıimiz ústem bolyp otyrady. Mine, kúni keshe Qazaq eliniń QR Tuńǵysh Prezıdenti - Elbasy Nursultan Nazarbaevtyń ókilettiligin toqtatqany týraly halqyna málimdemesin shettegi aǵaıyndar, biz de asa tolqynyspen qabyl aldyq. Árıne, Elbasynyń bul saıasaty ýaqytyn tapqan mańyzdy másele ekenin halyq túsinedi. Sonyń ózinde kóńilde bir kem dúnıe turǵandaı sezildi. Árıne, Qasym-Jomart Toqaevtyń Memleket basshysy bolýǵa ábden laıyq ekenin Mońǵolııa qazaqtary da jaqsy biledi. Eń bastysy ol - Nazarbaevtyń kóp jylǵy senimdi serigi, ǵylym-bilimniń, saıasattyń shyńdalǵan sardary. Q.Toqaevtyń Elbasy saıasatyn jalǵastyratynyna senemiz jáne ol bul senimdi tolyq aqtaıtynyn alǵashqy kúnnen bastap dáleldedi», - dedi ol.

Osy oraıda sheteldegi qandasymyz Astana qalasyn Nursultan dep ózgertýge qatysty pikirin bildirgen.

«Bul - óte oryndy sheshim, Nursultan Nazarbaevqa kórsetilgen úlken qurmet dep bilemiz. Qazaqstandyqtar álem jurtshylyǵyna elim degen adal uldaryn syılaı biletin parasatty halyq ekenin kórsetti. Bul ataq shyn máninde Elbasyna qajet emes. Bul ataq qazaqtyń abyroıyn asqaqtatady. Bizdiń márt el ekendigimizdi álem moıyndaıtyn bolady. Qymbatty qazaqstandyq qandas aǵaıyndar, nur jaınaǵan Nursultan qalasy qutty bolsyn! Álemniń ár túkpirindegi qandastarǵa nuryn tóge bersin! Shettegi bes mıllıon qazaq sizdermen birgemiz ári sizderdi qoldaımyz», - dedi Qýanbaı Bapaıaquly.