Shetsiz qala: Almatyda bıyl 1,1 myń sharshy metr turǵyn úı paıdalanýǵa berildi
ALMATY. QazAqparat – Epıdemıologııalyq jaǵdaıǵa qaramastan bıyl Almatyda 1100 myń sharshy metr turǵyn úı paıdalanýǵa berildi, bul - ótken jylǵy kórsetkishten 5,3%-ǵa artyq. Bul týraly Almaty qalalyq Josparlaý jáne ýrbanıstıka basqarmasynyń basshysy Almashan Ahmedjanov aıtty, dep habarlaıdy QazAqparat tilshisi.
«Bıyl memlekettik baǵdarlamalar boıynsha 2 mln 396 myń sharshy metr turǵyn úı salý kózdelgen. Onyń basym kópshiligi qala syrtynda salynady. 290 myń sharshy metr halyqtyń áleýmettik az qamtylǵan toptaryn qoljetimdi turǵyn úımen qamtamasyz etý úshin memlekettik bıýdjet esebinen qarjylandyrylady. Biz adam basyna shaqqanda 30 sharshy metr bolatyn josparǵa qol jetkizý úshin jumys isteýdemiz. Óıtkeni bul Almaty qalasynyń bas josparynda qarastyrylǵan», – deıdi basqarma basshysy.
Onyń aıtýynsha, kópfýnktsıonaldy turǵyn úı keshenderinde 8 523 páter, 1 235 jeke turǵyn úı jáne 3,2 myń sharshy metr jataqhana salynǵan.
«Shilde aıynda 1 590 páter jáne 167 turǵyn úı paıdalanýǵa berildi. Jyldyń sońyna deıin 8 277 páter jáne 752 jeke turǵyn úı salý josparlanǵan. Memlekettik bıýdjet qarajaty esebinen jyl sońyna deıin taǵy 5 myńǵa jýyq páterdi paıdalanýǵa beriledi», - deıdi Almashan Ahmedjanov.
Sonymen qatar, ol jaqyn arada 9 densaýlyq saqtaý nysany men Alataý aýdanynda tennıs kortynyń qurylysy bastalatynyn aıtty.
«Memlekettik-jeke menshik áriptestik aıasynda Alataý, Naýryzbaı jáne Túrksib aýdandarynda 12 900 orynǵa arnalǵan 8 mektep salynady. Budan basqa, qoldanystaǵy mektepterge 13 qosymsha qurylys nysandary salynady. Sondaı-aq 150 oryndyq balabaqsha salý josparlanǵan. Jeke ınvestorlardyń qarajaty esebinen 2 jeke mektep salynady»,– dep atap ótti ol.
