Shetpe stantsııasyndaǵy vokzaldyń aýmaǵy bes ese ulǵaıdy
ASTANA. KAZINFORM — Mańǵystaý oblysynda Shetpe temirjol vokzaly qaıta jańǵyrtýdan keıin paıdalanýǵa berildi. Jańartylǵan vokzaldyń ashylý rásimine Mańǵystaý oblysynyń ákimi Nurdáýlet Qılybaı, «Qazaqstan temir joly» UK» AQ ókilderi men merdiger uıymnyń qyzmetkerleri qatysty.
Joba Memleket basshysy Qasym-Jomart Toqaevtyń tapsyrmasyna sáıkes júzege asyrylyp jatqan elimizdegi 124 temirjol vokzalyn jańǵyrtý jónindegi aýqymdy memlekettik baǵdarlama aıasynda iske asyryldy.
Qaıta jańǵyrtý barysynda 1967 jyly salynǵan vokzal ǵımaraty tolyqtaı jańartyldy. Vokzaldyń qabyrǵasy qaıta turǵyzylyp, shatyry men qasbeti aýystyryldy, ınjenerlik jeliler tolyq jańartyldy, ishki árleý jumystary júrgizildi jáne vokzal mańy abattandyryldy.
Sondaı-aq aýmaǵy 2 100 sharshy metr bolatyn jańa jolaýshylar platformasy salyndy. Zamanaýı jabyn tóselip, múmkindigi shekteýli azamattarǵa arnalǵan taktıldi jolaqtar, navıgatsııalyq belgiler men abattandyrý elementteri ornatyldy. Vokzal jańa jıhazben jáne zamanaýı jabdyqtarmen qamtamasyz etildi. Qurylys barysynda otandyq óndiristiń materıaldary paıdalanyldy.
Joba nátıjesinde vokzal ǵımaratynyń jalpy aýdany 201 sharshy metrden 1 103 sharshy metrge deıin ulǵaıyp, bes eseden astam artty. Al táýliktik ótkizý qabileti eki ese ósip, 100 jolaýshydan 200 jolaýshyǵa deıin jetti. Jańartylǵan vokzal qaýipsizdik, energııa tıimdiligi jáne kedergisiz orta talaptaryna tolyq sáıkes keledi.
Shetpe stantsııasy arqyly Semeı, Qaraǵandy, Mańǵystaý, Aqtóbe, Atyraý jáne Oral baǵyttaryna qatynaıtyn 16 jolaýshylar poıyzy júredi.
Vokzaldy jańǵyrtý jolaýshylarǵa kórsetiletin qyzmet sapasyn arttyrýǵa, kútý jaǵdaılaryn jaqsartýǵa jáne turǵyndar men óńir qonaqtary úshin jaıly ári qaýipsiz orta qalyptastyrýǵa múmkindik beredi.
Eske salaıyq, buǵan deıin Aqmola oblysynda Jaqsy temirjol vokzalynyń ǵımaratyn rekonstrýktsııalaý jumystary aıaqtalǵanyn habarlaǵan edik.
