Shetelge jumys isteteýge barǵan aqtóbelik 125 jylǵa sottaldy

Aqtóbe qalasynyń turǵyny Rashıd Qadyrov mektep bitirip, áskerı boryshyn ótep, úılenip, az-maz kólik jóndeý ornynda eńbek etken. Keıin eshkimge aıtpastan jumys izdep, Túrkııaǵa attandy.

— Ulym 2024 jyly maǵan aıtpastan ketip qaldy. Onyń Túrkııa eline jumysqa ornalasamyn dep ketkenin nemeremnen bildim. Ol áýejaıǵa taksı shaqyryp bergen eken. Arada 4-5 aı ótkende ózge nómirden qońyraý shaldy. «Men Grekııada túrmege túsip qaldym» dep aıtty. Jumys berýshiler aldap túsirgen. Sot bolyp, oǵan 125 jyl jaza kesildi. Endi taǵy bir sot bolyp, sonda is qaıta qaralady eken. Biz ulymyzdy elge ákelgimiz keledi. Syrtqy ister mınıstrligine de ótinish berip otyrmyz, — dedi Nurhan Qadyrova.

Onyń aıtýynsha, uly áleýmettik jeli arqyly taraǵan habarlamaǵa senip, jumysqa barady. Tipti jumys berýshiler jolaqysyn da tólegen.

— Ol shetelge múlde shyǵyp kórmegen bala. Olardyń tilin, aǵylshynsha bilmeıdi. Qazaq jáne orys tilderin ǵana meńgergen. Baryp, bir qylmystyq topqa tap bolǵan sııaqty. Ol Túrkııada týrısterdi tasymaldap júrmin dep oılap Grekııa jerinen shyqqan. Sol jerde ustalyp, til bilmese de qoryqqanynan qujattarǵa qol qoıa bergen. Týrıst degeni mıgrattar eken. Onda tipti Reseı, Ózbekstan, Qyrǵyzstannan da adamdar otyr. Ózge elde júrgen balamnyń jaǵdaıyn oılap, ne isterimizdi bilmeı júrmiz, — dedi anasy.

Kazinform tilshisi SІM baspasóz qyzmetine habarlasty. Mınıstrlik quqyqtyq kómek kórsetip jatyr.

— Qazaqstan Respýblıkasynyń Syrtqy ister mınıstrligi Grekııada jazasyn ótep jatqan Qazaqstan azamaty týraly habardar. Atalǵan azamat Grekııa sotynyń sheshimimen zańsyz mıgranttardy tasymaldaǵany úshin jaýapkershilikti kózdeıtin bap boıynsha sottalǵan. Bul áreket jergilikti zańǵa sáıkes, aýyr qylmystar sanatyna jatady.

Grekııadaǵy dıplomattarymyz azamatqa óz quzyretteri sheńberinde qajetti konsýldyq-quqyqtyq kómek kórsetýde. Másele Mınıstrliktiń baqylaýynda, — dep habarlady SІM.

Aıta keteıik, 33 jyl boıy jylqy baǵyp, sottalǵan aqtóbelik raqymshylyqqa ilikti.