Shetelge zańsyz aqsha shyǵarýdyń jolyn kesetin qarjylyq top quryldy

NUR-SULTAN. QazAqparat – Shetelge qarajatty zańsyz aýdarý jaǵdaılarynyń jolyn kesetin halyqaralyq «Ekman» qarjylyq toby quryldy. Bul týraly QR birinshi qarjy vıtse-mınıstri Berik Sholpanqulov málim etti, dep habarlaıdy QazAqparat tilshisi.

«Halyqaralyq birlestikter «Ekman» qarjylyq tobyn qurdy. Ol uıym álem elderiniń qarjylyq barlaý qyzmetteriniń barlyǵyn qolastyna biriktirip otyr. Eger belgili bir elden zańsyz túrde kapıtal aýdarylatyn bolsa, onda ol shottyń ıesine óte qatań sharalar qabyldanady. ıAǵnı, zańsyz aýdarylǵan ol qarajatty atalǵan uıym ymyrasyz aryzdanǵan memlekettiń paıdasy úshin shottan sheship alýǵa deıingi sharany qabyldaýǵa qaýqarly», - dedi Berik Sholpanqulov búgin Úkimettiń baspasóz ortalyǵynda.

Aıta ketsek, byltyr Parlament Senatynda QR Qarjy mınıstrligi Memlekettik kirister komıteti tóraǵasynyń orynbasary mindetin atqarýshy Ýálıhan Dildábaev valıýtalyq zańnamany buzǵandardy jaýapkershilikke tartýdyń qıyndyqtaryn ataǵan bolatyn.

«Valıýtalyq túsimdi qaıtarmaǵany úshin qylmystyq jaýapkershilik QR QK-niń tek bir ǵana babynda qarastyrylǵan. Alaıda, osy baptyń ózimen jaýapkershilikke tartý problemaly bolyp otyr. Sebebi kináli adamnyń pıǵylyn dáleldeýdiń qıyndyǵy turǵysynda, baptyń redaktsııasy osy qubylyspen tolyqqandy kúresýge múmkindik bermeıdi», - degen edi Dildábekov valıýtalyq baqylaý máselesine arnalǵan jıynda.