Shetelge shyqqan qazaqtardyń arasynda menıngıtke shaldyqqandar joq

ASTANA. QazAqparat - Eldiń bas sanıtarlyq dárigeri shetelge sapar shekken qazaqstandyq týrısterdiń arasynda menıngokokk ınfektsııasyna shaldyǵý jaǵdaılaryn joqqa shyǵardy. Al syrt elderden ınfektsııalardyń juǵyp kelý oqıǵalary boldy: holeradan 6, malıarııadan 1 jaǵdaı oryn alǵan, dep habarlaıdy QazAqparat tilshisi.

«Kez kelgen belgi, ıaǵnı dene qyzýy kóterilse, bas aýrýy, ishek ınfektsııasy bilinse týrıst sol eldiń medıtsınalyq qyzmetine júginip, tekserilip, em alýdy bastap ketýi kerek», - dep eskertti Jandarbek Bakıshev.

Bas sanıtarlyq dáriger elge enetin juqpalardan aýlaq bolý kerektigin aıtyp ketti. «Ótken jyly qańtarda Eýropaǵa attanǵan týrısterimiz ol jaqtan holerany alyp kelgen. Bıyl osyndaı 6 jaǵdaı tirkelgen. Juqtyrǵan alty naýqastyń tórteýi kelisimen aýrýhanaǵa barǵan, qalǵan ekeýimen qosa olardy da esepke turǵyzdyq. Dıagnoz qoıylǵannan keıin naýqastar basqalardan oqshaýlandy. Malıarııany da juqtyrǵan jaǵdaı boldy, ony da dál solaı anyqtap, juqtyrǵan naýqasty oqshaýladyq», - dedi J.Bekıshev.

Onyń aıtýynsha, ınfektsııany alyp kelýden eshbir el saqtandyrylmaǵan. AQSh-ta osy ispettes júzdegen jaǵdaı tirkeledi. Olardyń sany týrısterdiń sanyna para-par. Reseıde júzden astam jaǵdaı tirkelgen, onyń biri - ótken jyly kelgen Ebola, Denge. Qyzmetter bizdiń elimizde mundaı oqıǵalardyń oryn almaýy úshin jáne epıdemııanyń taralýyn boldyrmaý úshin jumys jasap jatyr.