Shetelge shyǵýǵa tyıymnyń bar-joǵyn Telegram arqyly tekserýge bolady
Kezekti eńbek demalysy qarsańynda shetelde demalyp, týrıstik saparǵa shyǵýdy josparlaǵan qazaqstandyqtar boryshkerler tiziminde bar-joǵyn aldyn ala teksergeni abzal.
«Muny azamattar birneshe tásil arqyly teksere alady. Solardyń biri - Telegram qosymshasyndaǵy @EgovKzBot. Bot qyzmetin tańdaǵannan keıin paıdalanýshy «Boryshkerler tizilimi jáne shet elge shyǵýǵa tyıym salý boıynsha tekserý» servısine ótip, jeke sáıkestendirý nómirin engizýi qajet. Boryshkerler tiziminde bolmaǵan jaǵdaıda, avtomattandyrylǵan aqparattyq júıe berilgen JSN boıynsha eshqandaı derekterdiń tabylmaǵany jóninde habarlama jiberedi. Bot arqyly saparǵa birge shyǵatyn týysqandaryńyzdyń ne dostaryńyzdyń da bereshegin tekserýge bolady. Kerekti aqparat suraý jiberilgennen keıin birden kórsetiledi» delingen habarlamada.
Aıta keteıik, bir jyl buryn iske qosylǵan @EgovKzBot-ty 300 myńǵa jýyq qazaqstandyq qoldanyp úlgerdi. Bot qyzmetin paıdalaný úshin qazaqstandyqtar mobıldi azamattar bazasynda tirkelýi shart. Búginde ol bazaǵa 6,8 mln adam óz málimetterin engizgen.
Sonymen qatar, elektrondy tsıfrlyq qoltańba ıeleri egov.kz portalyndaǵy jeke kabıneti arqyly aıyppuldyń bar-joǵyn tekserip, bereshek anyqtalǵan jaǵdaıda, portal arqyly qaryzyn óteı alady.
Esterińizge sala keteıik, Qazaqstan aýmaǵynan tys jerge shyǵýǵa shekteý salyq, aıyppul nemese basqa adamdar aldynda sotqa júginýge deıin aparǵan qaryzdar, alıment, sonymen qatar kommýnaldyq qyzmetter boıynsha bereshegi barlarǵa qoıylýy múmkin.
