Shetelge shyǵatyn qazaqstandyqtar úshin «SmarttravelKZ» qosymshasy iske qosyldy
Atalǵan jobanyń basty maqsaty - shetelge shyǵatyn Qazaqstan azamattarynyń qaýipsizdigin qamtamasyz etý. Ol úshin mobıldi qosymshaǵa shet elder týraly aqparat, barǵan memlekette ózin ustaý normalary, qaýipti jaǵdaıda atqarylatyn sharalar, tótenshe jaǵdaılar kezindegi eskertýler jáne taǵy basqa mańyzdy málimetter engizilgen. Budan bólek, qosymsha paıdalanýshylary ózderi barǵan eldiń sanıtarlyq-epıdemıologııalyq jáne qylmystyq jaǵdaı týraly derekterdi taba alady. Shetelge kirgizýge jáne odan shyǵarýǵa tyıym salynǵan zattar týraly aqparat ta bar.
"Azamattarǵa yńǵaıly bolý úshin mobıldik qosymshada shet elderdegi saqtandyrý, medıtsınalyq qyzmet týraly keńester, paıdaly telefon nómirleri, sondaı-aq, medıtsınalyq jáne advokattyq mekemeler týraly aqparat bar. Qosymsha arqyly Qazaqstan konsýlymen baılanysqa shyǵyp, onlaın rejımde tótenshe jaǵdaılar boıynsha konsýldyq kómek alýǵa bolady. Konsýldarǵa dybystyq xabarlama jiberýge, ıa bolmasa, ózińe qońyraý shalsyn dep tapsyrys berýge bolady. Elektrondy xabarlama jazý qyzmeti de qarastyrylǵan", - dedi konsýldyq qyzmet departamentiniń dırektory Ardaq Madıev búgin Ortalyq kommýnıkatsııalar qyzmetinde ótken baspasóz máslıxatynda.
Onyń aıtýynsha, atalǵan mobıldi qosymsha "Tsıfrlyq Qazaqstan" baǵdarlamasy aıasynda daıarlanyp otyr. Búginde bundaı qosymshany damyǵan memleketterdiń bári qoldanady. QR Syrtqy ister mınıstrligi mobıldik qosymshanyń qoldanysqa engizilgeni jaıynda barlyq konsýldarǵa xabar berdi.