Shetelge shyǵatyn qazaqstandyq týrısterdi saqtandyrý tártibi ózgeredi
«Zań jobasyndaǵy ekinshi baǵyt - bul týroperatordyń jaýapkershiligin saqtandyrýdan shetelge shyǵýshy týrıstiń ózin saqtandyrýǵa ótý. Qazirgi kezde týroperatordyń jaýapkershiligin saqtandyrý kezinde saqtandyrý tek týroperatordyń kinási dáleldengen kezde ǵana jumys isteıdi. Bul óte sırek kezdesetin jaǵdaı. Týrıst, ádette, densaýlyǵyna keltirilgen zııandy óteýge baılanysty óz máselelerimen jalǵyz qalady. Zań jobasy shetelge shyǵýshy týrısterdi saqtandyrý tártibin ózgertýdi qarastyrady. Týroperator joldamany satqan kezde týrıstke saqtandyrý kýáligin berýge mindetti bolady. Saqtandyrý kýáliginde shetelde táýlik boıy medıtsınalyq kómek kórsetetin halyqaralyq kompanııalardyń telefondary kórsetiletin bolady. Shetelde saqtandyrý jaǵdaıy oryn alǵan kezde, týrıst medıtsınalyq qyzmet kórsetýge, jedel medıtsınalyq kómekke jáne repatrıatsııa boıynsha shyǵyndalmaıdy. Bul shyǵyndardy halyqaralyq kompanııaǵa saqtandyrý kompanııasy tólep beredi», - dep túsindirdi QR Ulttyq bankiniń tóraǵasy Danııar Aqyshev.
Onyń sózine qaraǵanda, týroperator úshin saqtandyrý quny qymbat bolmaıdy dep kútilýde, ıaǵnı kúnine 320 teńge shamasynda. Sonymen qatar 3-ten 16 mln teńgege deıin shyǵyndar saqtandyrylatyn bolady. Bul saqtandyrý tek týroperatorlardyń kómegine júgingen týrıster úshin ǵana jumys isteıtin bolady.
«Týroperatorlarǵa júginbeıtin týrıster jáne óz betinshe shetelge shyǵatyn azamattar jaýapkershilikti derbes kóteredi jáne memleket olardy ózderin saqtandyrýǵa mindetteı almaıdy», - dedi UB basshysy.