Shetelge shyǵatyn balalarǵa tólqujat jasalýy tıis - ІІM
NUR-SULTAN. QazAqparat - QR Іshki ister mınıstrligi 16 jasqa deıingi balalardyń ata-analarymen birge shetelge shyǵý kezinde fotosýretterin olardyń tólqujattaryna japsyrý talabyn alyp tastaý úshin elimizdiń zańnamalaryna túzetýler engizip jatyr, dep habarlaıdy QazAqparat.
Mınıstrlik málimetinshe, ata-analardyń tólqujatyna balalary týraly qolmen engizilgen jazbada bıometrııalyq málimetter bolmaıdy. Sol sebepten shekaradan ótý kezinde problemalar týyndap, keı jaǵdaıda azamattar keri qaıtarylyp jatady.
«Álem boıynsha qujattyq-vızalyq baqylaýdan ótkizý, jeke basty anyqtaý sharalary jetildirilýde jáne bıometrııalyq málimetteri bar qujattar (tsıfrly fotosýretter, saýsaq tańbalary, kózdiń shatyrsha qabyǵynyń keskini jáne t.b.) engizilýde. Qazaqstandyqtar kóp baratyn elderde (AQSh, Ulybrıtanııa, BAÁ, Italııa, Ispanııa, Frantsııa, Chehııa, Slovenııa, Horvatııa, Gretsııa, Vengrııa, Polsha, Germanııa, Shveıtsarııa, Shvetsııa, Qytaı, Ońtústik Koreıa jáne basqalary) sol memleketke ata-analarymen kelgen balalardyń tólqujaty bolýy mindetti. Al ata-ananyń tólqujatyna balalardyń fotosýretterin japsyrý qujat retinde moıyndalmaıdy», - dep atap ótedi vedomstvodan.
Ata-analardyń tólqujatyna fotosýretterdi japsyrýdan bas tartý birinshi kezekte shetelde qıyn jaǵdaıda tap bolýy múmkin balalardy qorǵaýǵa jáne olardy shetelge zańsyz tasymaldaý táýekelderine baılanysty bolyp otyr.
Balalarǵa tólqujat tek shetelge shyqqanda ǵana qajet. Respýblıka aýmaǵynda onyń týýy týraly kýálikpen, úlken azamattar jeke kýáligimen rastalady.
«Qazir jazǵy demalys jaqyndap keledi. Osyǵan baılanysty ІІM shetelge barýdy josparlaǵan ata-analarǵa basqa memlekettiń shekarasynan erkin ótý úshin ózderimen baratyn balalardyń tólqujattaryn kúni buryn rásimdeýge keńes beredi», - delingen mınıstrlik aqparatynda.
