Shetelge sapar: Elge din aman oralýdyń joly qandaı

ASTANA. QazAqparat - QR Densaýlyq saqtaý mınıstrligi Qoǵamdyq densaýlyq saqtaý komıteti el azamattaryna shetelde bolǵan kezde densaýlyǵyn barynsha qalaı qorǵaý kerektigi týraly keńes berdi, dep habarlaıdy QazAqparat.  

Sonymen komıtet ınfektsııalyq jáne parazıttik aýrýlardyń aldyn alý úshin, sondaı-aq demalysyńyz buzylmas úshin saıahat barysynda mynadaı keńes beredi:

- ishýge tek bótelkedegi nemese qaınatylǵan sýdy paıdalaný. Qaınamaǵan sýdan daıyndalǵan muzdy paıdalanbaý kerek;

- tek belgili jáne tekserilgen qoǵamdyq tamaqtaný oryndaryna barý;

- jemisterdi, kókónisterdi ishýge jaramdy sýmen jaqsylap jýý jáne qaınatylǵan sýmen shaıý;

- et, balyq, teńiz ónimderi termııalyq óńdeýden keıin paıdalanylýy tıis;

- tamaqtanar aldynda qoldy sabynmen jýý, qolǵa arnalǵan antıseptıkterdi (sanıtaızerlerdi) paıdalaný;

- tek basseınderde nemese arnaıy sý qoımalarynda ǵana júzý;

- turatyn oryndar (qonaqúı bólmesi, nómiri jáne t.b.) masalar úshin qoljetimdi bolmaýy tıis (moskıt torlary, ınsektıtsıdti quraldar, repellentter);

- keneniń shaǵýy múmkin bolatyn tabıǵatta serýendegen ýaqytta jeńi uzyn aqshyl tústi kıim, shalbar, uzyn kóılek kııý qajet. Deneniń ashyq bólikterine repelentter paıdalaný kerek;

sapar ýaqytynda nemese odan oralǵan kezde densaýlyq jaǵdaıy nasharlaǵan kezde mindetti túrde dárigerge qaralý kerek.

Sonymen qatar komıtet álemdegi epıdemıologııalyq ahýalmen de bólisken. Máselen, tyrysqaq álemniń 22 elinde tirkelgen. Negizinen Afrıkanyń 16 elinde keńinen taraǵan. Al sibir jarasy álemniń 14 elinde bar. Atalǵan elder mynalar: Indonezııa, Úndistan, Qıtaı, Bangladesh, Qazaqstan, Qyrǵyzstan, Fılıppın, Rýmynııa, Grýzııa, Tanzanııa, Zambııa, Zımbabve, Kenııa, Gvıneıa.

«SDS (AQSh aýrýlardy baqylaý jáne aldyn alý ortalyǵy) aqparatyna sáıkes epıdemııalyq maýsymnan bastap balalar arasynan tumaýdan 37 ólim jaǵdaıy tirkelgen. Japonııada sońǵy jyldardaǵy tumaýdyń eń úlken órshýi baıqalady, barlyǵy 3 mln jýyq adam naýqastanǵan, tek sońǵy apta boıy syrqattanǵandardyń sany 1 mln adamǵa deıin ósti», - dep atap ótedi komıtet.

Esterińizde bolsa, buǵan deıin Mysyrda otbasymen demalǵan qazaqstandyq Oleg Vasılenkonyń denesi irińdep, kúldirep ketkendigi belgili bolǵan edi. Mysyrlyq dárigerler teriniń kúldireý sebebin anyqtaı almaǵan bolatyn. Dıagnoz elordaǵa kelgennen keıin qoıyldy.