Shetelge oqýǵa jiberemiz degen jeleýmen 152 mln teńge jymqyrǵan ortalyq basshysy sottaldy

ASTANA. KAZINFORM — Elorda turǵyny bilim berý salasynda qyzmet kórsetemiz degen jeleýmen 52 azamattyń jalpy somasy 152 mln teńge qarajatyn ıemdengen. Bul týraly Astana qalasynyń prokýratýrasy málim etti. 

— Kináli bilim berý ortalyǵynyń negizin qalaýshy bola tura, áleýmettik jelidegi akkaýnttar jáne buqaralyq aqparat quraldarynda jarnamalar arqyly azamattarǵa shetelde oqytýdy uıymdastyrý jeleýimen Eýropalyq joǵarǵy oqý oryndaryna túsirýdi jáne shetelde bir jyldyq til biliminen bosatýǵa múmkindik beretin halyqaralyq sertıfıkattardy berýge ýáde etip kýrstarǵa jazylýdy usynǵan, — delingen habarlamada. 

Alaıda ýáde etilgen sertıfıkattar berilmegen, al shet elge oqýǵa túsý is júzinde oryndalmaǵan. Sonymen qatar sottalǵannyń kompanııasynda kórsetilgen salada qyzmetti júzege asyrý úshin halyqaralyq akkredıtatsııa bolmaǵany anyqtaldy.

Máselen, halyqaralyq sertıfıkatty alyp, balasyn Eýropada bilim alýǵa daıyndatýǵa nıet bildirgen jábirlenýshilerdiń biri 3 mln teńgege jýyq shyǵyndalǵan. Kináliniń ózine júktelgen mindetterin oryndaýǵa múmkindigi bolmaǵany, al jábirlenýshilermen kelisim-shartty qylmystyq nıetin oryndaý maqsatynda jasaǵandyǵy jáne urlanǵan aqsha qarajatyn óziniń jeke qajettilikterine paıdalanǵany dáleldendi.

Sottalǵan óz kinásin moıyndamady. Sot úkimimen kináli 7 jylǵa oqý oryndaryn uıymdastyrýǵa baılanysty qyzmetpen aınalysý quqyǵynan aıyryla otyryp, 6 jylǵa bas bostandyǵynan aıyrý jazasyna sottaldy. Jábirlenýshilerdiń azamattyq talaptary qanaǵattandyryldy.

Astana qalasynyń prokýratýrasy alaıaqtyq jasaǵany úshin múlkin tárkileı otyryp, 10 jylǵa deıin bas bostandyǵynan aıyrý jazasy kózdelgenin nazarǵa salady.  

Aıta keteıik, buǵan deıin Jetisý oblysynda azamattardyń atyna 40 mln teńge nesıe rásimdegen alaıaq sottaldy.