Shetelge kóship ketken azamattardan alıment óndirý protsesi jeńildeıdi
ASTANA. QazAqparat - Búgin QR Parlamenti Senatynyń jalpy otyrysynda «Balalarǵa alımentterdi jáne otbasyn kútip-baǵýdyń basqa da nysandaryn óndirip alýdyń halyqaralyq tártibi týraly konventsııany jáne Alımenttik mindettemelerge qoldanylatyn quqyq týraly hattamany ratıfıkatsııalaý týraly» QR Zańy qabyldandy.
Konventsııa basqa elge qonys aýdarǵan jáne ózderiniń balalaryn kútip-baǵýǵa zań boıynsha tıisti qarajatty tólemeıtin neke buzǵan ata-analardan alımentterdi óndirip alý protsesin jeńildetýge jáne jedeldetýge baǵyttalady. Sonymen qatar, qujat Qazaqstannyń balalyq shaqty qorǵaý boıynsha saıasatyna sáıkes keledi.
«Konventsııada alımentterdi óndirip alý týraly sheteldik sot sheshimderi men alımenttik kelisimderdi oryndaýdyń ámbebap tártibi aıqyndalady. Konventsııa ratıfıkatsııalanǵan jaǵdaıda Qazaqstan Eýropalyq Odaqpen jáne Hattamaǵa qatysatyn 27 elmen (Ýkraınany, Bosnııa jáne Gertsegovınany, Norvegııany, Chernogorııany, Albanııany, Ulybrıtanııany qospaǵanda) yntymaqtasa alady», - dedi Ádilet mınıstri Berik Imashev.
Onyń aıtýynsha, Konventsııaǵa sáıkes, basqa elder ótinishterdi tek ortalyq organǵa ǵana jiberýge tıis. Al ortalyq organ retinde keıinnen Joǵarǵy Sot janyndaǵy Sottardyń qyzmetin qamtamasyz etý departamenti belgilenetin bolady.
Tutastaı alǵanda Hattama ata-analardyń neke jaǵdaıyna qaramastan balaǵa qatysty alımenttik mindettemelerin qosa alǵanda, otbasy qatynastarynan, shyǵý teginen, nekeden jáne týystyqtan týyndaıtyn alımenttik mindettemelerge qoldanylatyn quqyq anyqtalady.
