Shetelge demalysqa attanar aldynda neni eskerý kerek

Tólqujat rásimdeý tártibi
Mınıstrliktiń habarlaýynsha, shetelde demalý kezinde keleńsiz jaǵdaıǵa tap bolmas úshin eń áýeli tólqujattyń qoldanylý merzimin tekserip alý qajet. Óıtkeni, keı memleketterge kirý úshin pasportty qoldaný merziminiń bitýinen 6 aı buryn aýystyrý kerek.
Elimizde 2009 jyldan bastap bıometrııalyq pasporttar (elektrondyq chıpi bar) beriledi. Olardyń qoldanylý merzimi - 10 jyl. Osyǵan baılanysty, ІІM azamattarǵa jaramdylyq merzimi ótip ketken qujattardy ýaqtyly aýystyrý qajettigin eskertedi. Bizdegi zańnama boıynsha jańa pasportty burynǵy pasporttyń jaramdylyq merzimi aıaqtalýyna bir aı qalǵanda qaıta rásimdeýge bolady.
Qazaqstan azamattaryna qujattar 15 jumys kúni ishinde beriledi. Eger ýaqyt tyǵyz bolsa, tólqujatty jyldamdatylǵan tártipte 1-7 jumys kúni ishinde (Nur-Sultan, Almaty, Aqtóbe, Shymkent qalalarynda - 1 jumys kúni ishinde, oblys ortalyqtarynda - 3 jumys kúni ishinde, oblys aýdandary men qalalarynda - 7 jumys kúni ishinde) rásimdeı alady.
Shetelge 16 jasqa tolmaǵan balalarmen birge shyqqan jaǵdaıda, olarǵa da aldyn ala pasport rásimdegen jón. AQSh, Ulybrıtanııa, BAÁ, Italııa, Ispanııa, Frantsııa, Chehııa, Slovenııa, Horvatııa, Gretsııa, Majarstan, Polsha, Germanııa, Shveıtsarııa, Shvetsııa, Qytaı, Ońtústik Koreıa jáne basqa da elderde memleketke ata-analarymen keletin balalarda pasporttyń bolýy mindetti jáne pasportqa balanyń fotosýretin japsyrý qujat dep tanylmaıdy.
Aıyppuldar men bereshekter
Boryshker retinde shetelge shyǵý quqyǵy shektelgen azamattardyń qatarynda turmaǵanyńyzdy tómendegi joldarmen anyqtaýǵa bolady.
1. «Shetelge shyǵýy shektelgen, boryshkerler tizilimi jáne atqarý óndirisi boıynsha boryshkerlerr tizilimi boıynsha shet elge shyǵýǵa tyıym salynǵan-salynbaǵanyn tekserý» atty arnaıy qyzmeti.
2. QR Ádilet mınıstliginiń saıtynda ornalasqan «Qazaqstan Respýblıkasy sheginen shyǵýy ýaqytsha shektelgen tulǵalardyń tizimi», «Atqarýshylyq is júrgizý boıynsha boryshkerler tizimi» derekter bazasynan ózińizdiń aty-jónińizdi izdep, elden shyǵýǵa tyıym salynǵan-salynbaǵanyn tekserý.
3.Ákimshilik quqyq buzý jáne tólenbegen aıyppuldardyń bar-joǵyn tekserý.
Vızalyq rejim
Kózdegen elge saparǵa shyqpas buryn Qazaqstan azamattary úshin vızalyq tártip qandaı ekenin bilý qajet. Eger vıza talap etilse, onda muny dıplomatııalyq ókildik, konsýldyq mekeme nemese týrıstik agenttik arqyly aldyn ala daıyndaý kerek.
Vızasyz rejim bolǵan jaǵdaıda sol elde bolý merzimi men tártibin naqtylaý qajet. Ony Qazaqstan Respýblıkasy Syrtqy ister mınıstrliginiń saıtynan bilýge bolady. Eger siz qandaı da bir el arqyly tranzıtpen júrýdi josparlasańyz, tranzıttik vızalarǵa qatysty keńes alyńyz.
Vızada derekterdiń durys jazylǵanyn jáne vızanyń qoldanylý merzimin, shet memlekette bolýǵa ruqsat etilgen kúnderdiń sanyn mindetti túrde pysyqtańyz.
Shetelge oqý, jumys isteý nemese turaqty turý maqsatynda barsańyz, AHAJ bergen kýálikter men anyqtamalarǵa, bilimi, múliktik qatynastary, eńbek qyzmeti jáne áleýmettik qamtamasyz etý týraly qujattarǵa, múmkindiginshe sottylyqtyń joqtyǵy týraly anyqtamalarǵa apostıl qoıǵyzǵan jón.
Medıtsınalyq saqtandyrý jáne dári-dármekter
Shetelde bolǵan kezeńde medıtsınalyq saqtandyrý polısin satyp alýdy usynamyz. Bul medıtsınalyq kómekke júgingen jaǵdaıda shyǵyndardy jabýǵa múmkindik beredi.
Ózińizben birge dári-dármek alsańyz, bara jatqan elde ol dárilerge ruqsat berilgenin bilý kerek. Ystyq elderge shyǵý kezinde dıfterııaǵa, sirespege, polıomıelıtke, sary qyzbaǵa qarsy ekpe alý qajet. Mekkege barýshylarǵa menıngokokqa qarsy vaktsına jasatý usynylady.
Afrıka jáne Ońtústik-Shyǵys Azııa elderine uzaq saparlaıtyn bolsańyz, V gepatıtine qarsy ekpe jasatý oryndy. Keıbir elder talap etiletin ekpelerdiń bar ekeni týraly anyqtama bolmasa, kirgizbeýi múmkin.
Kedendik baqylaý
Qazaqstannan syrtqa 10 000 AQSh dollaryna deıingi mólsherde qolma-qol aqsha alyp shyǵa alasyz. Odan kóp bolsa, deklaratsııa qajet bolady. Sondaı-aq, siz baratyn elde qandaı nárselerge deklaratsııa kerek ekenin, qandaı jaǵdaıda kerek emes ekenin naqtylap alý kerek.
Shekara arqyly aqsha nemese taýarlardy deklaratsııasyz zańsyz ótkizý áreketi ákimshilik jáne qylmystyq jolmen jazalanady.
Saparǵa shyqqan kezde súıikti ónimderińizdi nemese temeki markalaryn ózińizben birge alýǵa nıet bildirseńiz, aldymen oǵan tyıym salynbaǵanyn anyqtaý kerek. Mysaly, musylman elderine alkogolmen kirýge bolmaıdy.
Ýákiletti organdardyń ruqsatynsyz mádenı qundylyqtardy, jabaıy flora men faýna obektilerin, qarý men oq-dárilerdi ákelýge jáne áketýge bolmaıdy. Avıakóliktiń qol júginde shanyshqy nemese kesetin zattardy, túri qarýǵa uqsaıtyn balalar oıynshyqtaryn nemese basqa da zattardy alyp júrýge bolmaıdy.
Sondaı-aq birqatar elderde suıyqtyqtar men gelderdi alyp ótýge shekteý qoıylǵan.
Minez-qulyq normalary
Shetelde bolǵan kezde bizdiń azamattar basqa eldiń zańdaryn saqtaýǵa mindetti.
Etıka men moraldyń jalpyǵa ortaq normalaryn ustanyp, eldegi saıası jáne klımattyq jaǵdaılar týraly aqparatpen aldyn ala tanysqan jón.
Kútpegen jerden quqyq qorǵaý organdary ustaǵan bolsa, jol-kólik oqıǵasy jáne taǵy basqa oqys jaǵdaılarǵa tap bolsańyz, sol memlekettegi qazaqstandyq konsýldyq mekemeniń qyzmetkerimen kezdesýdi talap etýge quqylysyz. QR konsýldyq mekemesiniń qyzmetkerlerinsiz shet tilindegi hattamalar men qujattarǵa qol qoıýǵa bolmaıdy.
Siz bara jatqan eldegi Qazaqstan elshilikteriniń nemese konsýldyǵynyń telefondaryn jazyp alyp, týystaryńyz ben dostaryńyzǵa óz saparyńyz, ornalasqan jerińiz ben baılanys nómirlerińiz týraly habarlaǵan jón.