Shetelge demalýǵa shyǵatyn qazaqstandyqtardy qorǵaý sharalary kúsheıedi

NUR-SULTAN. QazAqparat – Shetelge demalýǵa shyǵatyn qazaqstandyqtardy qorǵaý sharalary kúsheıtilmek. Bul sharalar QR keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly zań jobasynda qamtylyp otyr, dep habarlaıdy QazAqparat tilshisi.

«Shyǵý týrızminde týrısterdi qorǵaý deńgeıin arttyrý boıynsha sharalar keshenin qabyldaý usynylady. Týroperatorlar uıymdastyrǵan shyǵý týrızmi sheńberinde Qazaqstan Respýblıkasynyń azamattaryna týrıstik kod berý tetigin engizý, sondaı-aq kepildik berý somalaryn jınaý jáne qaıtarý tártibin reglament tártibin engizý josparlanýda», - dedi Mádenıet jáne sport mınıstri Aqtoty Raıymqulova májilismender aldynda zań jobasyn qorǵaı otyryp.

Mınıstr sonymen qatar zań jobasynyń kómegimen oljalyq ań aýlaýdy damytý, fermerlik ańshylyq sharýashylyǵynyń kásipkerligin qoldaý sharalary josparlanǵanyn málim etti.

«Álemdik tájirıbe kári janýarlardy joıýdyń ǵylymı negizdelgen lımıti popýlıatsııaǵa depressııalyq áser etpeıtinin, al keı jaǵdaılarda onyń ónimdiligin arttyratynyn dáleldedi. Qazaqstanda kóptegen sırek kezdesetin túrler popýlıatsııasynyń qazirgi jaǵdaıy turaqtalǵanyn aıta ketýge bolady», - dedi ol.