Shetelge zańsyz aqsha shyǵarǵan kompanııaǵa 150 mln teńgeden astam aıyppul salyndy

ASTANA. KAZINFORM - Prokýrordyń ótinishi boıynsha kompanııaǵa shetelge qarajatty zańsyz shyǵarǵany úshin 150 mln teńgeden astam aıyppul salyndy.

Mańǵystaý oblystyq prokýratýrasynyń málimetterinshe, Aqtaý qalasynyń prokýratýrasy QR 1,8 mln AQSh dollaryn valıýtalyq zańnamanyń talaptaryn buza otyryp shetelge shyǵarǵan «B» kompanııasyna qatysty ákimshilik is júrgizýdi toqtatý týraly qaýlysyna ótinishhat keltirdi.

Prokýrordyń ótinishin qaraý nátıjesinde oblystyq sot alqasy buryn qabyldanǵan sheshimniń kúshin joıyp, kompanııany ákimshilik quqyq buzýshylyq jasaǵany úshin kináli dep tanydy.

Sot valıýtalyq túsimdi ýaqtyly repatrıatsııalamaǵany úshin kompanııaǵa 153 mıllıon teńge kóleminde ákimshilik aıyppul saldy. Sot qaýlysy zańdy kúshine endi.

Qabyldanǵan sheshim valıýtalyq operatsııalardy retteıtin zańnama normalaryn múltiksiz saqtaý mańyzdylyǵyn rastaıdy jáne memlekettiń ekonomıkalyq múddelerin qorǵaýǵa baǵyttalǵan.

- Prokýratýra zańdylyqtyń saqtalýyn qadaǵalaý jáne eldiń ekonomıkalyq qaýipsizdigin qorǵaý boıynsha júıeli jumystaryn jalǵastyrady, - delingen habarlamada.

Osyǵan deıin Bas prokýratýra memleketaralyq izdeýde júrgen 1,5 myń adamǵa qatysty jaǵdaıdy túsindirgen edi.