Sheteldikterdi quldyqta ustaǵan: Shymkenttegi kirpish zaýytynyń qojaıyndary ustaldy
Shymkentte Uıymdasqan qylmysqa qarsy kúres basqarmasy zańsyz eńbekke tartty degen kúdikpen eki kirpish zaýytynyń qojaıynyn ustady, dep habarlaıdy Kazinform.
14 qazan kúni Almaty qalasy polıtsııa departamentiniń «102» arnasyna Aqtóbe qalasynyń turǵynynan aryz túsken. Onda Ózbekstan azamaty eńbek quldyǵynan qashyp qutylyp, Almatydaǵy ápkesiniń janyna kelgenin aıtqan. Buǵan deıin ony Shymkenttegi kirpish zaýytynyń qojaıyndary «fızıkalyq kúsh kórsetemin» dep qorqytyp ustap kelgenin jetkizgen. Alaıda belgisiz bireýler qaıtadan inisiniń izine túsip, qara tústi BMW kóligimen urlap ketkeni jóninde shaǵymdanǵan.
Qylmystyń aýyrlyǵyn eskere otyryp, Almaty jáne Shymkent qalalarynyń Uıymdasqan qylmysqa qarsy kúres basqarmasynyń qyzmetkerleri birlesken arnaıy jedel is-sharalar júrgizip, kúdikti retinde úsh er adamdy ustady. Olar kirpish zaýyttarynyń ıeleri, ekeýi aǵaıyndy bolyp shyqty.
Tintý jumystaryn júrgizý kezinde jedel ýákilder eki zaýyttyń aýmaǵynan 60-tan astam sheteldikti tapty. Olar kórshi Ózbekstannan kelgen.
«Sotqa deıingi tergep-tekserý barysynda sheteldikter zaýytqa jumysqa shaqyrylǵany anyqtaldy. Sodan keıin olardyń qujattaryn tartyp alyp, jalaqy berilmegeni jáne únemi fızıkalyq zorlyq-zombylyq kórsetemiz dep korqytyp ustaǵany belgili boldy» - delingen Shymkent qalasy polıtsııa departamentiniń baspasóz qyzmeti taratqan aqparatta.
Búgin de 25 sheteldik jumysshy «Sana-sezim» qoǵamdyq birlestiginiń qamqorlyǵyna alynsa, 30-dan astam azamat jeke basyn kýálandyratyn qujattarynyń bolmaýyna baılanysty qabyldap-taratý ortalyǵyna ornalastyryldy.
«Polıtsııaǵa kúdiktilerge qatysty sheteldik azamattardan úsh resmı aryz tústi. Kúdiktiler qamaýda. Olardyń ústinen QR Qylmystyq kodeksiniń eki baby: 126 «Bas bostandyǵynan zańsyz aıyrý» jáne 389 «Ózinshe bılik etý» boıynsha sotqa deıingi tergeý amaldary júrgizilip jatyr. Saraptama taǵaıyndaldy» - delingen vedomstvo tarapynan usynylǵan aqparatta.
Posmotret etý pýblıkatsııý v Instagram
