Sheteldikter JSN-di bir jumys kúni ishinde onlaın rásimdeı alady

Іshki ister mınıstrligi osy maqsatta pılottyq jobany iske qosty.

Jańa tártip Іshki ister mınıstriniń 2026 jylǵy 2 qarashadaǵy №825 buıryǵynda qarastyrylǵan. Qujatqa sáıkes, Qazaqstanda ýaqytsha júrgen shetel azamattary men azamattyǵy joq adamdar JSN rásimdeý jáne ondaǵy málimetterdi túzetý qyzmetin QazETA mobıldi qosymshasy arqyly ala alady. Ol úshin MAQ kóshi-qon qyzmetteriniń tsıfrlyq platformasy paıdalanylady.

Qyzmetti paıdalaný úshin aldymen QazETA qosymshasyna tirkelý qajet. Tirkelý kezinde ótinish berýshi jeke derekterin jınaýǵa jáne óńdeýge kelisim berip, jeke basyn kýálandyratyn qujatyn telefon kamerasyna túsiredi. Sondaı-aq bıometrııalyq sáıkestendirýden ótedi.

Odan keıin qosymshadan shetel azamattary men azamattyǵy joq adamdarǵa JSN berý jáne ony túzetý qyzmetin tańdaıdy.

Júıe aldymen ótinish berýshiniń Qazaqstanǵa kirgeni týraly málimetterdi tekseredi. Sodan soń paıdalanýshy óziniń ornalasqan jerin rastap, jeke basyn qosymsha tekserýden ótedi. Avtomatty túrde toltyrylǵan málimetterdiń durystyǵyn tekserip, týǵan jerin, baılanys derekterin jáne ultyn kórsetýi kerek.

Ótinish Іshki ister mınıstrliginiń aqparattyq júıesine túsedi. Onda jaýapty qyzmetker qujattardyń durys toltyrylǵanyn, málimetterdiń sáıkestigin jáne ótinish berýshiniń atyna buryn JSN tirkelgen-tirkelmegenin tekseredi.

Memlekettik qyzmet bir jumys kúni ishinde kórsetiledi. Ótinish berilgen kún bul merzimge eseptelmeıdi.

Ótinish nátıjesin QazETA qosymshasynan kórýge bolady. Paıdalanýshy ótinishiniń mártebesin tekserip, JSN týraly málimet ala alady. Tirkeý kýáligi bolǵan jaǵdaıda ony PDF formatynda júktep alýǵa múmkindik bar.

Ótinish berýshiniń derekteri belgilengen talaptarǵa saı kelmese nemese usynylǵan qujattar men málimetter jalǵan bolsa, qyzmet kórsetýden bas tartylýy múmkin.

Pılottyq joba 2026 jylǵy 9 qarashadan bastap bir jyl boıy júzege asyrylady.

Buǵan deıin sheteldikterge jeke sáıkestendirý nómirin berý qaǵıdalaryn ózgertý usynylǵanyn habarlaǵan edik.