Shetel azamattary úshin janarmaı baǵasy 40 teńgege ósedi
ASTANA. KAZINFORM – Energetıka mınıstrligi shetel azamattary úshin benzın men dızel baǵasyn ózgertetin buıryqtyń jobasyn jarııalady.
«Energetıka mınıstrligi ishki naryqta otyn balansyn saqtap, munaı ónimderiniń aǵyndary men «sur» eksportynyń táýekelderin azaıtý maqsatymen avtokóliktiń janarmaı tutyný kólemine jáne shyǵý tegine baılanysty Aı-92, Aı-93 benzıni men dızel otynyna naqtylanǵan baǵalary bar buıryq jobasyn daıyndady.
Qazaqstan qazirgi tańda janarmaı baǵasyna memlekettik retteý júrgizip otyrǵandyqtan Eýrazııalyq ekonomıkalyq odaq elderi arasynda janar-jaǵarmaı quny eń tómen el bolyp esepteledi. Bul munaı ónimderiniń basqa elderge shyǵarý jáne «sur» eksport táýekelderin týyndatady», - dep bastalady mınıstrliktiń túsindirmesi.
Bul jerdegi «sur eksport» degen uǵym qoldanystaǵy saralanǵan baǵany janarmaı quıý stansalarynyń satýshylarymen «ymyralasý» arqyly aınalyp ótý tásilin sıpattaý úshin qoldanylyp otyr.
«Buıryq jobasy boıynsha AI-92 jáne Aı-93 markaly benzınniń baǵasy lıtrine 245 teńge deńgeıinde belgilenedi dep boljanady. Qazaqstan Respýblıkasynda berilgen júrgizýshi kýáligin kórsetken kezde táýligine 100 lıtrge deıingi kólemde baǵa lıtrine 205 teńge qalpynda ózgerissiz qalady. Qazaqstan Respýblıkasynda berilgen mototsıklderge, jeńil, júk, arnaıy, mamandandyrylǵan avtomobılder men avtobýstarǵa júrgizýshi kýáligi men kólik quralyn tirkeý týraly kýálik usynylǵan kezde táýligine 300 lıtrge deıin – lıtrine 205 teńge kóleminde», - delingen resmı málimette.
ıAǵnı, janarmaı stansasynda Qazaqstannyń quzyrly organy bergen júrgizýshi kýáligin kórsetý arqyly bir táýlikti AI-92 jáne Aı-93 markalyq benzınniń 100 lıtrin 205 teńgeden satyp alýǵa bolady. Al dızeldiń bir lıtri sheteldik kólikter úshin 315 teńge dep belgilenýi múmkin. Qazaqstandyq júrgizýshi kýáligin kórsetý arqyly bir táýlik ishinde 100 lıtr dızeldi 295 teńgeden satyp alýǵa bolady. Bul shekten asqan ár lıtrge 315 teńgeden tóleı bastaıdy.
«Qujatta dızel otynynyń baǵasy (jazǵy, maýsymaralyq) lıtrine 315 teńgeni quraıdy dep boljanady. Qazaqstan Respýblıkasynda berilgen júrgizýshi kýáligin kórsetken kezde táýligine 100 lıtrge deıin lıtrine 295 teńge; Qazaqstan Respýblıkasynda berilgen júk, arnaıy, mamandandyrylǵan avtomobılder men avtobýstarǵa júrgizýshi kýáligin jáne kólik quralyn tirkeý týraly kýálikti kórsetken kezde táýligine 300 lıtrge deıin– lıtrine 295 teńge», - dep jazylǵan túsindirmede.
Qorytyp aıtsaq, júrgizýshi kýáligi men kólik quralyn Qazaqstan Respýblıkasynda tirketken, sáıkesinshe kólik salyǵyn Qazaqstan bıýdjetine tólep júrgen azamattar úshin janarmaı baǵasy qazirgi kúıinde, ózgerissiz qalady.
Biraq bul ázirge buıryq jobasy ǵana ekenin aıta ketý kerek. Qujat kúshine ený úshin «Ashyq-NQA» portalynda jarııalanǵan nusqasyn múddeli memlekettik organdardyń bári maquldaýy kerek.
