Sheteldikter úshin kóshpendiler vızasy engiziledi

ASTANA. KAZINFORM – Elimizde sheteldik azamattar úshin qazirgi zamanǵy kóshpendiler vızasyn engizý máselesi pysyqtalyp jatyr. Bul týraly búgin Úkimet otyrysynda Týrızm jáne sport mınıstri Ermek Marjyqpaev aıtty.

«Vızalyq kóshi-qon rejımi máselesi týrıster tarapynan kóptegen shaǵym týdyrady. Týroperatorlardyń habarlaýynsha, sheteldik kelýshiler vızalyq kóshi-qon portalynyń tehnıkalyq aqaýyna baılanysty vıza alý kezinde qıyndyqtarǵa tap bolady. Nátıjesinde týroperatorlar sheteldik týrıster úshin brondalǵan bıletterdi alyp tastaýǵa májbúr. Osyǵan baılanysty elge kelgennen keıin vıza alý boıynsha áýejaılardaǵy kóshi-qon qyzmetterinde personal sanyn kóbeıtý jáne onyń portalynyń úzdiksiz jumysyn qamtamasyz etý usynylady», - dedi mınıstr.

Onyń atap ótýinshe, munan bólek vıza alý rásimderin tsıfrlandyrý jáne ońaılatý arqyly atalǵan rejımdi jetildirý qajet.

«Múddeli memlekettik organdarmen birlesip, sheteldik azamattarǵa elde uzaq merzimdi bolý quqyǵyn bere otyryp, qazirgi zamanǵy kóshpendilerdiń vızasyn engizý máselesi qaralyp jatyr (jumys ataýy – NEO Nomad Visa). Bul sharany engizýden kútiletin ekonomıkalyq nátıje jyl saıyn 3 mlrd teńgeden asady. Qazirgi ýaqytta Neo Nomad Visa engizý tetigi ázirlenip, múddeli memlekettik organdarǵa joldandy», - dedi Ermek Marjyqpaev.