Sheteldikter qazaqstandyq sportshyny anıme keıipkerlerimen salystyryp jatyr
ASTANA. KAZINFORM – Qazaqstandyq sportshy Jasmın Begalınova kútpegen jerden jeli juldyzyna aınaldy. Bir kúnde tanymal bolǵan sportshy bolashaq jospary týraly Jibek Joly telearnasynyń «Búgin Live» baǵdarlamasynda bólisti.
Jasmınniń aıtýynsha, onyń jarys kezinde túsirilgen sýretteri ǵalamtorda keń taralyp, sheteldik qoldanýshylar arasynda qyzý talqylanǵan. Tipti jeli qoldanýshylary fan-arttar salyp, sportshyny tanymal anıme keıipkerlerimen salystyra bastaǵan.
– Fotosýretim jeti mıllıonnan astam qaralym jınady. Sheteldikter meni tanymal beıneoıyndardyń, anıme keıipkerlerimen salystyryp, ázildep Qazaqstanǵa kóshýge daıyn ekenderin jazyp jatyr. Munyń bári men úshin kútpegen jaǵdaı boldy. Bul týraly alǵash ret dostarym men tanystarymnan estidim. Sýretti alǵash bolyp frantsýz azamaty bólisken eken. Pikirlerdi oqı otyryp, adamdardyń maǵan ǵana emes, Qazaqstanǵa da qyzyǵýshylyq tanyta bastaǵanyn baıqadym. Keıin túrli modeldik agenttikter túsirilimderge shaqyra bastady, – dedi ol.
Alaıda ol sportshynyń aldaǵy josparyna áser etpegen.
– Qazir Óskemen qalasynda turamyn. Kolledjde jattyqtyrýshy mamandyǵy boıynsha bilim alyp júrmin. Bolashaǵymdy tek sportpen baılanystyramyn. Eń úlken armanym – Olımpıada oıyndaryna qatysý, – dedi sportshy.
Aıta keteıik, Jasmın jeńil atletıkaǵa úsh jyl buryn ǵana kelgen. Soǵan qaramastan, ol bıiktikke sekirýden sport sheberligine kandıdat normatıvin oryndap úlgergen. Buǵan deıin jeti jyl boıy basketbolmen aınalysqan.
Al álem nazaryn aýdartqan fotosýretter jaqynda Shymkentte ótken jastar arasyndaǵy Qazaqstan chempıonatynda (U23) túsirilgen.
– Bul jarysta úshinshi oryn aldym. Buǵan deıin el chempıonattarynda únemi tórtinshi orynmen shekteletinmin. Al bul joly qola júldege qol jetkizdim. Onyń ústine óz jas sanatymda ǵana emes, ózimnen áldeqaıda úlken sportshylarmen de synǵa tústim. Sondyqtan bul jetistiktiń men úshin mańyzy erekshe, – dedi Jasmın Begalınova.
Eske salaıyq, Azııa chempıonatyna qatysatyn Qazaqstan quramasynyń tizimi belgili boldy.
