Sheteldikter Qazaqstanda qoǵamdyq birlestikterge quryltaıshy bola almaıdy
ASTANA. KAZINFORM — Shet eldiń azamattary Qazaqstanda qoǵamdyq birlestikterge múshe bola alady, alaıda quryltaıshy bolý quqyǵy joq. Konstıtýtsııalyq Sot osyndaı málimdeme jasady.
Konstıtýtsııalyq Sot qoǵamdyq birlestikterdiń quryltaıshysy bolýǵa quqyǵy bar adamdar tobyn retteıtin «Qoǵamdyq birlestikter týraly» Qazaqstan Respýblıkasy Zańynyń 10-babynyń Konstıtýtsııaǵa sáıkestigin tekserý týraly ótinishti is júrgizýge qabyldaýdan bas tartty.
— Reseı Federatsııasynyń azamaty Astana qalasynyń Ádilet departamentine Qazaqstan azamattary men shetel azamattarynyń bastamasymen qurylǵan qoǵamdyq birlestikti tirkeý týraly ótinishpen júgingen bolatyn. Quzyrly organ tirkeýden bas tartty, — delingen sot taratqan aqparatta.
Konstıtýtsııalyq Sot Zańnyń bul erejesi Konstıtýtsııany buzbaıtynyn jáne azamattar men sheteldikterdiń quqyqtyq mártebesiniń arajigin ajyratýdyń negizgi qaǵıdattaryna sáıkes keletinin rastady.
— Qaýlyda Konstıtýtsııaǵa sáıkes sheteldikter men azamattyǵy joq adamdardyń quqyqtary men bostandyqtarynyń shekteýli kólemi bar ekendigi jáne eger olar zańda kózdelgen jáne konstıtýtsııalyq qurylysty qorǵaý, qoǵamdyq tártipti, adamnyń quqyqtary men bostandyqtaryn, halyqtyń densaýlyǵy men ımandylyǵyn qorǵaýǵa baǵyttalǵan jaǵdaıda mundaı shekteýlerge jol beriletini atap kórsetilgen (Konstıtýtsııanyń 39-baby), — delingen sot organynyń habarlamasynda.
Sondaı-aq, Konstıtýtsııalyq Sot Qazaqstan ratıfıkatsııalaǵan azamattyq jáne saıası quqyqtar týraly halyqaralyq paktiniń erejeleri, eger olar demokratııalyq qoǵamnyń talaptaryna sáıkes kelse, qaýymdastyq bostandyǵy quqyǵyna zańmen belgilengen shekteýlerge jol beretinin atap ótti.
— Konstıtýtsııaǵa jáne Qazaqstan Respýblıkasynyń qoldanystaǵy zańnamasyna sáıkes Qazaqstan Respýblıkasynyń azamattary ǵana qoǵamdyq birlestikterdiń quryltaıshylary, al eger sheteldikter men azamattyǵy joq adamdardyń qatysýyna qoǵamdyq birlestiktiń jarǵysynda jol berilse, olar qoǵamdyq birlestikterdiń músheleri bola alady (Qoǵamdyq birlestikter týraly zańnyń 10 jáne 11-baptary), — dep atap ótti vedomstvo.
Osylaısha, Konstıtýtsııalyq Sot ótinish berýshiniń konstıtýtsııalyq quqyqtaryn buzý belgilerin anyqtaǵan joq jáne konstıtýtsııalyq is júrgizýge ótinishti qabyldaýǵa negiz joq degen qorytyndyǵa keldi.
Buǵan deıin Konstıtýtsııalyq Sot ıadrolyq synaqtan zardap shekken halyqty áleýmettik qoldaýdy qaıta tekserýden bas tartqanyn jazǵanbyz.