Sheteldikter Qazaqstan qalalarynyń tazalyǵyna tańǵalyp júr – Prezıdent
ASTANA. KAZINFORM – Qazaqstannyń iri qalalaryndaǵy tazalyq, qaýipsizdik jáne jaıly qoǵamdyq keńistikter sheteldik qonaqtardyń da nazaryn aýdaryp otyr. Alaıda Memleket basshysy Qasym-Jomart Toqaev eldi kórkeıtý jumysy halyqaralyq ımıdj úshin emes, eń aldymen azamattardyń turmys sapasyn jaqsartý úshin jasalýy keregin aıtty.
– Tabıǵatty aıalaý, ózara qurmet qaǵıdattaryn, sondaı-aq barlyq belgilengen normalar men erejelerdi saqtaý otandastarymyzdyń minez-qulqynyń, tipti ult bolmysynyń ajyramas bóligine aınalýǵa tıis. Onyń ústine, qazir Konstıtýtsııanyń ózi osyǵan mindetteıdi, – dep atap ótti Q. Toqaev Prezıdent saıabaǵynda ótken ekologııalyq aktsııada.
Memleket basshysynyń aıtýynsha, tazalyq, tártip jáne jaılylyq álemde halyqtyń turmys mádenıeti men órkenıet deńgeıiniń, sondaı-aq adamgershilik qasıetteriniń kórinisi retinde qarastyrylady.
El ishindegi jetistikter halqymyzdyń patrıottyq sezimin oıatady. Óz elin maqtan tutyp, týǵan jerge paıdasyn tıgizýge úndeıdi.
– Jaqynda Astana men Almatyǵa Amerıkanyń belgili kongressmenderi keldi. Olar kóshelerdiń tazalyǵy men jınaqylyǵyna tańǵalyp, qalany basqarý deńgeıi men sapasyna joǵary baǵa berdi. Áleýmettik jelilerde iri qalalarymyzdyń kelbetine tánti bolǵan sheteldik qonaqtar men týrısterdiń beınejazbalaryn jıi baıqaımyz. Kórikti qoǵamdyq keńistikter, qaýipsizdik pen jaılylyq shetelde Qazaqstanǵa qatysty oń pikir qalyptastyrady. Bul, árıne, qýantarlyq jaıt. Degenmen biz ımıdj úshin jumys istemeı, azamattarymyzdyń áleýmettik jaǵdaıyn jaqsartýdy oılaýymyz kerek. Basty maqsat – osy, – dep túıindedi Prezıdent.
Buǵan deıin Q. Toqaev elimizdiń árbir azamaty búgin de, erteń de «Taza Qazaqstanda» jaıly ómir súrýi kerektigin aıtqan edi.
Jyl basynan beri «Taza Qazaqstan» aktsııasyna 7 mln adam qatysyp, 130 myń gektar jer tazartylǵan.
Prezıdent «Taza Qazaqstandy» jańa deńgeıge kóterip, ulttyq tazalyq standartyn ázirleýdi usyndy.
