Sheteldikter Dımashtyń áni arqyly qazaq tilin úırenip jatyr

ASTANA. KAZINFORM – Endi shetel azamattary Dımash Qudaıbergenniń áni arqyly qazaq tilin úırene alady. Bul týraly «Til-qazyna» ulttyq ǵylymı-praktıkalyq ortalyǵy Abaı ınstıtýtynyń jetekshisi Aınur Tóleý aıtty.

– Dımashtyń tyńdarmandary arnaıy platforma jasaý kerektigin usyndy. Sebebi, olar súıikti ánshisiniń ne týraly aıtyp jatqanyn túsingisi keledi eken. Biz osy usynysty mamandarmen aqyldasyp, karaoke stılinde jasap shyqtyq. Ánshi fanattarynyń basym bóligi batystan bolǵandyqtan, ánniń sózderin latyn qarpinde jazdyq, - dedi ol «Jibek Joly» arnasyndaǵy «BúginLive» baǵdarlamasynda.

Osy qosymsha arqyly qazaq tilin úırengen azamattar qazirdiń ózinde áleýmettik jelidegi paraqshaǵa pikirlerin jazyp otyrady eken.

– Sheteldik azamattar Dımash arqyly tek qazaqtyń tilin ǵana emes, ádebıeti men mádenıetin de meńgerip jatyr. Tipti bizdiń ulttyq tamaqtarymyzdan dám tatqylary keletini týraly jazady. Sondyqtan, qosymshany odan ári salt-dástúrlerdi qosyp jetildiremiz, - deıdi Aınur Tóleý.

Aıta keteıik, Abaı ınstıtýtynyń portaly men arnaıy mobıldi qosymshasy arqyly kez kelgen sheteldik qazaq tilin meńgere alady. Bul portal tek sabaq berip qana qoımaıdy. Munda sheteldegi qazaq dıasporasy úshin daıyndalǵan beınesabaqtar, qazaq jáne aǵylshyn tilindegi tapsyrmalar, tipti Abaı ınstıtýtynyń búkil álemdegi ókildikteriniń baılanys derekteri bar.

— Joba 2020 jyly iske qosylǵan. Álemniń kez kelgen núktesinde kez kelgen adam sońǵy ádistemelik tásildermen qazaq tilin óz betinshe úırene alady, - deıdi joba qurastyrýshylary.

Aıta keteıik, buǵan deıin Dımashtyń halyqaralyq jobasy Qazaqstannyń týrıstik áleýetin tanystyratynyn jazǵan edik.