Sheteldikter Astanadaǵy BaiQymyz-2026 festıvali týraly áserimen bólisti
ASTANA. KAZINFORM – Astanada ótip jatqan BaiQymyz-2026 halyqaralyq gastronomııalyq festıvali qazaq mádenıeti men ulttyq taǵamdaryn dáripteıtin alań ǵana emes, túrli elden kelgen adamdardyń basyn qosqan erekshe merekege aınaldy.
Sheteldik qonaqtar qazaq halqynyń salt-dástúrimen jaqynyraq tanysyp, ulttyq taǵamdardan dám tatyp, Qazaqstannyń qonaqjaılyǵyn sezindi.
Shetelden kelgen qonaqtar elimizdiń tarıhy men mádenı murasymen tanysyp, ulttyq sport túrlerinen ótetin jarystardy tamashalap, etnoaýyldardy, qolóner kórmeleri men gastronomııalyq aımaqtardy aralap júr.
Ásirese, qymyz sekildi ulttyq taǵamdar, sondaı-aq ulttyq oıyndar men at sporty jarystary sheteldik meımandarǵa erekshe áser qaldyrdy. Olardyń aıtýynsha, mundaı sharalar Qazaqstannyń biregeı mádenıetin dástúrler arqyly tereńirek tanýǵa múmkindik beredi.
— Biz Amerıka Qurama Shtattarynan keldik. Qymyz festıvaline qazaq mádenıetimen jaqynyraq tanysý úshin arnaıy keldik. Qazaqstanda turyp, adamdarǵa kómektesý bizge unaıdy, bul — keremet tájirıbe. Osy jerde kóptegen tamasha jandarmen tanystyq, qazaq mádenıeti týraly kún saıyn jańa dúnıeler bilip jatyrmyz. Eń bastysy — qymyzdy jaqsy kórip qaldyq, onyń múmkindiginshe kóp túrinen dám tatqymyz keledi, — dedi AQSh-tan kelgen Ýaıt pen Tomas.
Sheteldik qonaqtardyń aıtýynsha, BaiQymyz-2026 festıvali Qazaqstandy ulttyq dástúri, mýzykasy, sporty jáne halqynyń qonaqjaılyǵy arqyly jańa qyrynan tanýǵa múmkindik bergen.
Eske salaıyq, BaiQymyz-2026 halyqaralyq gastronomııalyq festıvali 11-12 shilde kúnderi Astanadaǵy «Qazanat» ıppodromynda ótip jatyr.
Baǵdarlama aıasynda ulttyq taǵamdardan dám tatý, kórmeler, mádenı jáne sporttyq is-sharalar, at sporty shoýlary, otbasylyq alańdar men tanymal ánshilerdiń kontsertteri uıymdastyrylǵan.
Aıta ketelik BaiQymyz-2026 festıvalinde 60-tan astam qymyz óndirýshi óz ónimderin usyndy.
