Sheteldikter asyrap alǵan balalardyń eshbiri Qazaqstan azamattyǵyn tańdamaǵan - SІM

ASTANA. KAZINFORM – Syrtqy ister mınıstrligi Kazinform saýalyna joldaǵan jaýabynda sheteldikter elimizden asyrap alǵan balalardyń eshbiri 18-ge tolǵannan keıin Qazaqstan azamattyǵyn tańdamaǵanyn málim etti.

«Qazirgi tańda Qazaqstannan asyrap alynǵan balalar kámelet jasyna deıin qos azamattyqqa quqyly («QR azamattyǵy týraly» zańy, 27-bap). QR shet elderdegi mekemeleri árdaıym asyrap alynǵan balalarmen kezdesýler barysynda QR azamattyǵy máselesin jáne QR zańnamasynyń normalaryn túsindirýge kómek kórsetedi. Ókinishke qaraı, kámelet jasyna tolǵandardyń barlyǵy shetel azamattyǵyn alýda. Búgingi tańda Qazaqstan azamattyǵynyń paıdasyna shetel azamattyǵynan bas tartý jaǵdaılary tirkelmegenine nazar aýdarý qajet», - dep jazylǵan jaýapta.

Mınıstrlik dereginshe, sheteldikter asyrap alǵan balalar óz tarıhı otanyna qyzyǵýshylyq tanytyp, Qazaqstan elshilikterine habarlasý jaǵdaılary da kezdesip turady. 

«Mundaı jaǵdaılarda elshilik tarapynan balalarǵa tıisti aqparat berilip, elimiz, salt-dástúrimiz, qazaq tili týraly kitaptar usynylady jáne arnaıy kádesyılar tabystalady. 2019 jyly SІM uıymdastyrýymen «Meniń elim – Qazaqstan» baǵdarlamasy sheńberinde AQSh, Ispanııa jáne Italııa azamattary asyrap alǵan balalar asyraýshy ata-analarymen birge elimizge shaqyrylyp, olar Astana men Almaty qalalaryn jáne ózderiniń týǵan jerlerin aralap kórdi.

Balalardyń Qazaqstanǵa kelýge degen suranysy men qyzyǵýshylyǵyn eskere otyryp, qazirgi tańda SІM usynysymen Ýákiletti organ osy jyly «Jazǵy lager» uıymdastyrýdy josparlap otyr», - delingen jaýapta.