Sheteldikter álemdik kreatıvti ekonomıka konferentsııasyndaǵy qazaqstandyq stendke joǵary baǵa berdi
TAShKENT. KAZINFORM – Ózbekstan astanasynda ótken IV Álemdik kreatıvti ekonomıka konferentsııasynda «Creative Innovation Institute» Ortalyq Azııanyń Turaqty damý qory Qazaqstandaǵy kreatıvti ındýstrııanyń áleýetin tanystyrdy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Aýqymdy is-sharaǵa kreatıvti ekonomıka salasyndaǵy beldi halyqaralyq sarapshylar, birneshe eldiń mádenıet mınıstrlikteriniń ókilderi jáne osy ındýstrııada tabysty jumys istep kele jatqan kompanııa basshylary qatysty. Onyń barysynda kretıvti ındýstrııa baǵytyna engizilip jatqan tyń tehnologııalar men jasandy ıntellekttiń bolashaq múmkindigi, ekonomıkalyq damýǵa áseri haqynda sóz qozǵaldy.
Sonymen qatar, álemdik konferentsııa aıasynda Creative Village alańynda túrli eldiń tól mádenıeti men kreatıvti ındýstrııa salasyndaǵy áleýetin tanystyratyn kórmeler uıymdastyryldy.
Onyń ishinde qazaqstandyq stend kelýshiler men sarapshylardyń joǵary baǵasyna ıe boldy. Uıymdastyrýshylar onda ornalasqan ár element pen ulttyq taǵamdar arqyly qazaq halqynyń baı tarıhyn tanystyryp, qonaqjaılyq qasıetin kórsetýge tyrysqan.
«Bizge bul jobany uıymdastyrý ońaı bolmady, degenmen ony sátti júzege asyrdyq. Komandamyz Qazaqstannyń atyn halyqaralyq arenada ilgeriletýge kúsh jumsap keledi. Osy stend aıasynda biz «PLATON 5D» bilim berý jobasyn tanystyrdyq. Bul platformada kreatıvtilik pen turaqty damý maqsattaryna qol jetkizýdiń tıimdi tásilderi ushtastyrylǵan. Ol halyqaralyq sarapshylar tarapynan joǵary baǵaǵa ıe boldy. Biz kómek kórsetken Almaty Creative, Almaty Art Museum sııaqty seriktesterimizge alǵys bildiremiz», - dedi Creative Village alańynda qazaqstandyq stendti tanystyrǵan Irına Harıtonova.
Belgili sarapshy, Sent-Lıýsııada ornalasqan Artýr Lıýıs atyndaǵy qoǵamdyq kolledjdiń rektory Keıt Nors qazaqstandyq stendtiń biregeıligin atap ótip, ár el kreatıvti ındýstrııa salasyna mamandardy erte jastan baýlý kerektigine toqtaldy.
«Kreatıvti ındýstrııaǵa adamdardy erte jastan tartý mańyzdy. Bul olardyń oı-órisin damytyp, jan-jaqty saraptama jasaı alýyna, ózgerip jatqan jaǵdaıǵa tez beıimdelýine járdemdesedi», - dedi Keıt Nors.
Buǵan qosa, atalǵan konferentsııaǵa qatysqan QR Mádenıet jáne aqparat vıtse-mınıstri Evgenıı Kochetov eldegi kreatıvti ındýstrııanyń qarqyndy damyp kele jatqanyna toqtaldy. Ol atap ótkendeı, Qazaqstan 2029 jylǵa deıin onyń úlesin jalpy ishki ónimniń 1% jetkizýdi kózdep otyr.
«Men Ózbekstanda kreatıvti ındýstrııa salasynda jumys istep jatqan shaǵyn jáne orta bıznes týraly aqparatpen tanystym ári kórshiles eldiń jetistigine qýanyshtymyn. Munda atalǵan salada 12 myń kásiporyn jumys istep jatyr, al Qazaqstanda kreatıvti ındýstrııa baǵytynda 50 myńǵa jýyq kásipkerlik sýbektisi bar. Olarda 100 myńnan astam adam jumyspen qamtylǵan. Byltyr Memleket basshysy Qazaqstan halqyna Joldaýynda kreatıvti eknomıkany damytý boıynsha keshendi sharalar qabyldaý qajettigin aıtty. Osyǵan saı, bizde bıyldan bastap arnaıy salyq rejımi engizildi. Ol arqyly jeńildik alatyn kreatıvti ındýstrııa sýbektileriniń tizimin keńeıte tústik. Tıisinshe, bıyldyń ózinde bul salada 6 myń kásiporyn ashyldy», - dep túıindedi Evgenıı Kochetov.
