Sheteldik jumys kúshi tek kadr tapshylyǵy bar salaǵa tartylady
ASTANA. KAZINFORM – Aıda Balaeva Kóshi-qon saıasaty tujyrymdamasynyń negizgi erejelerin túsindirdi. Bul týraly Úkimettiń baspasóz qyzmeti habarlady.
Memleket basshysy Qasym-Jomart Toqaevtyń tapsyrmalaryn júzege asyrý aıasynda Premer-mınıstrdiń orynbasary — mádenıet jáne aqparat mınıstri Aıda Balaeva Úkimettiń 2025 jylǵy jeltoqsanda qabyldaǵan 2030 jylǵa deıingi Kóshi-qon saıasaty tujyrymdamasynyń negizgi erejelerin túsindirdi.
Onyń aıtýynsha, qazirgi zamanda kóshi-qon saıasaty qoǵamdaǵy, ekonomıkadaǵy jáne álemdegi ózgeristerdiń aıqyn kórsetkishine aınalyp otyr. Sondyqtan kóptegen elder óz kóshi-qon saıasatyn qaıta qarap jatyr. Qazaqstan da bul baǵytta naqty qadamdar jasap, kóshi-qon júıesin zaman talabyna saı jańartyp keledi. Ol ashyq ári aıqyn bolyp, eń bastysy memleket pen azamattardyń múddesine qyzmet etýge tıis.
2025 jylǵy jeltoqsanda Úkimet 2030 jylǵa deıingi kóshi-qon saıasatynyń tujyrymdamasyn qabyldady. Bul qujatta ekonomıkanyń qajettiligi, azamattardyń múddesi men ulttyq qaýipsizdik máseleleri jan-jaqty qarastyrylǵan.
— Eń aldymen, biz Qazaqstan azamattarynyń múddesin basshylyqqa alamyz. Sheteldik jumys kúshi tek naqty kadr tapshylyǵy bar salalarǵa ǵana tartylady. Kóshi-qon baǵyt-baǵdary óńirler men naqty jobalardyń suranysyna saı qalyptasady, — dedi ol.
Bul rette basty nazar «Zań jáne Tártip» qaǵıdatynyń saqtalýyna salynatyn bolady.
— Zań bárine ortaq. Sondyqtan kóshi-qon talaptaryn buzǵandar jaýapkershilikten syrt aınalyp kete almaıdy. Bul talap mıgranttarǵa da, jumys berýshilerge de birdeı qoldanylady. Qaýipsizdik elge kirýden bastap, elden shyǵýǵa deıin tolyq qamtamasyz etiledi.
Bizdiń maqsatymyz — Qazaqstanǵa zańdy syılaıtyn, mádenıetimizdi qurmetteıtin adamdardyń kelýi, — dep atap ótti mınıstr.
2026 jylǵy qańtardan bastap jańa tártip engiziledi. Shetel azamattary, sonyń ishinde etnıkalyq qazaqtar, aldyn ala irikteýden ótedi. Oǵan memlekettik tildi bilý testi, tsıfrlyq saýalnama, ýákiletti organdardyń tekserýleri jáne áńgimelesý kiredi.
Memlekettik qoldaýǵa úmitti qandastarymyz úshin arnaıy tártip bar.
Memlekettik jeńildikter men qoldaý baǵdarlamalaryn paıdalaný úshin olar qandas mártebesin rásimdep, eńbek kúshi tapshy óńirlerge qonystanýy kerek. Bul — Aqmola, Abaı, Qostanaı, Pavlodar, Atyraý, Batys, Shyǵys jáne Soltústik Qazaqstan oblystary.
— Biz otandastarymyzdy memlekettik strategııany ustanýǵa shaqyramyz. Óńirlik kvotaǵa kirgen qandastar kóship kelgen kezde 5 jylǵa áleýmettik kelisimshart jasaıdy. Memleket olarǵa kóshýge, baspanaǵa jáne jumysqa ornalasýǵa kómektesedi. Al eger otbasy bes jyl ótpeı basqa óńirge kóshse, alǵan kómekti qaıtarýǵa tıis bolady, — dep túsindirdi Aıda Balaeva.
Sonymen qatar balama jol da bar. Memlekettik qoldaýsyz, jalpy tártippen turaqty turýǵa ruqsat alý. Bul jaǵdaıda óńirdi óz qalaýyńyzsha tańdaı alasyz.
Mınıstrdiń aıtýynsha, jańa kóshi-qon saıasaty kezeń-kezeńimen engiziledi. Qoǵamnyń, bıznestiń jáne óńirlerdiń pikiri eskeriledi. Zańdy qurmetteıtin, adal azamattarǵa árdaıym basymdyq beriledi. Tsıfrlyq quraldar zańsyz áreketter men jalǵan qujattardy joıýǵa múmkindik beredi.
— Kóshi-qon máselesi zańdy, qaýipsiz ári baqylaýda bolýǵa tıis. Tek sonda ǵana ol memleketimiz ben azamattarymyzdyń múddesine saı keledi, — dep túıindedi ol.
Aıta ketelik Eńbek mınıstrligi 2030 jylǵa deıingi kóshi-qon saıasaty tujyrymdamasy jobasyn ázirlegeni týraly jazǵan edik.