Sheteldik jolaýshylar áýe reısinde qoǵamdyq tártipti buzǵany úshin jaýapqa tartyldy

ASTANA. KAZINFORM – Almaty – Dýbaı baǵytyndaǵy áýe reısine baǵyt alǵan sheteldik qos jolaýshy ushpaı qaldy. Olar qoǵamdyq tártipti buzǵany úshin jaýapqa tartyldy. 

«Almaty qalasy áýejaıyndaǵy jelilik polıtsııa bóliminiń qyzmetkerleri akt boıynsha Almaty — Dýbaı baǵytyndaǵy áýe reısinen eki jolaýshyny túsirip aldy. Polıtseıler tekserý kezinde 24 jáne 25 jastaǵy Reseı Federatsııasynyń eki azamatshasyn anyqtady. Olar ushaqqa otyrǵyzý kezinde masań kúıde bolyp, qoǵamdyq tártipti buzǵan», - delingen habarlamada. 

Medıtsınalyq kýálandyrý qorytyndysyna sáıkes, ustalǵan azamatshalarda ortasha dárejeli alkogoldik masańdyq anyqtaldy. Quqyq buzýshylar alkogoldik ishimdikterdi ishkeni nemese qoǵamdyq oryndarǵa masań kúıinde kelgeni úshin jaýapkershilikke tartylyp, árqaısysyna 5 AEK mólsherinde aıyppul salyndy.

Esterińizge sala keteıik, osy jyldyń basynan beri kólik polıtseıleri túrli ákimshilik quqyq buzýshylyqtar jasaǵany úshin 30 871 azamatty ákimshilik jaýapkershilikke tartty, onyń ishinde alkogoldik ishimdikter ishkeni nemese qoǵamdyq oryndarǵa masań kúıinde kelgeni úshin — 2339.