Sheteldik ýnıversıtettiń Reseıde ashylǵan alǵashqy fılıaly – Pýtın Ál-Farabı atyndaǵy QazUÝ týraly
ASTANA. KAZINFORM — Reseı Federatsııasynyń Prezıdenti Vladımır Pýtın Reseı ýnıversıtetterinde, sonyń ishinde Qazaqstandaǵy segiz fılıalda 60 myńnan astam qazaq stýdenti oqyp jatqanyn aıtty.
— Gýmanıtarlyq jáne bilim berý salasyndaǵy baılanys, akademııalyq-ǵylymı yqpaldastyq nyǵaıyp keledi. Prezıdent Toqaev ekijaqty yntymaqtastyqty damytýǵa jastardyń atsalysýy mańyzdy ekenin birneshe ret aıtty. Men bul pikirmen tolyq kelisemin. Sebebi jastarymyz Reseı-Qazaqstan qarym-qatynasynyń bolashaǵyn aıqyndaıdy, jetistikterimizdi eseleıdi jáne seriktestigimizge tyń serpin beredi.
Qazir Reseı ýnıversıtetterinde, sonyń ishinde Qazaqstandaǵy segiz fılıalda 60 myńnan astam qazaq stýdenti oqyp jatyr. Aldaǵy oqý jylynda Qazaqstan azamattaryna arnalǵan úkimettik kvota sany 800-ge deıin artady, — dedi ol.
Pýtın byltyr qyrkúıekte Reseıde Ál-Farabı atyndaǵy Qazaq ulttyq ýnıversıtetiniń fılıaly ashylǵanyn aıtty.
— Qazaqstanda Reseıdiń kóptegen jetekshi ýnıversıtetteriniń fılıaldary, sonyń ishinde Máskeý memlekettik ýnıversıteti men Máskeý memlekettik halyqaralyq qatynastar ınstıtýtynyń bólimsheleri jumys istep jatyr. 2025 jyldyń qyrkúıek aıynda Reseıde Ál-Farabı atyndaǵy Qazaq ulttyq ýnıversıtetiniń fılıaly ashyldy. Bul — bizdiń elimizde bólimshesin ashqan alǵashqy sheteldik joǵary oqý orny. Muny erekshe atap ótken jón.
Biz Almatyda «Qazaqstan-Sırıýs» halyqaralyq jalpy bilim berý mektebin jáne Daryndy balalar men jasóspirimder ortalyǵyn salý úshin birlesip jumys istep jatyrmyz. Osy bilim ordalaryn 2029 jyly ashýdy josparlap otyrmyz. Sonymen birge Astanada dál osyndaı ekinshi keshen salý týraly kelisimge qol jetkizdik, — dedi Vladımır Pýtın.
Aıta ketelik Vladımır Pýtın Qazaqstanǵa memlekettik saparmen keletini týraly jazǵan edik.
