Sheteldik týrısterge salynatyn jarna qaıtaryla ma - vıtse-mınıstr jaýap berdi
ALMATY. KAZINFORM - Almatyda Qytaıdaǵy Qazaqstan týrızm jylynyń jabylýyna arnalǵan halyqaralyq forým ótti. Іs-shara barysynda QR Týrızm jáne sport mınıstriniń orynbasary Erjan Erkinbaev Kazinform tilshilerine sheteldik týrıster tóleıtin jarna máselesi týraly aıtyp berdi.
Vıtse-mınıstrdiń aıtýynsha, týrısterge arnalǵan jarna álemniń kóptegen elderinde sátti qoldanylyp keledi. Biraq týrızmniń damýyna kedergi bolmaý úshin Qazaqstan salyqtyń bul túrinen ýaqytsha bas tartqan.
- Bed tax týrıstik jarnasy arqyly sheteldik meımandardan 1 jylǵa jýyq ýaqyt ishinde Almatyda 500 mln teńgeden astam qarajat jınaldy. 2-3 dollar olar úshin kóp emes, al bıýdjet úshin sońynda jaqsy tabys ákeledi. Biraq basshylyq Qazaqstan týrızminiń damýynyń qazirgi satysynda sheteldik týrısterge barynsha az aýyrtpalyq túsirý kerek dep sheshim qabyldady, - dedi vıtse-mınıstr.
Sondaı-aq Erjan Erkinbaev sheteldik týrısterdiń jarnasy zańnamalyq turǵyda saqtalǵanyn atap ótti.
- Búgin el boıynsha jarna kólemi 0 teńge bolyp belgilengen. Biraq bed tax zańnan alynǵan joq. Bolashaqta Qazaqstan týrızmi aıtarlyqtaı damyǵanyn aıta bastaǵan kezde biz suraqqa qaıtyp oralamyz, - dedi ol.
Vıtse-mınıstr Almatynyń erekshe mártebesin eskere otyryp, megapolıstiń ózinde ǵana týrıstik jarnany engizý qanshalyqty múmkin ekenin aıtty.
- Bul múmkin. Biraq bul suraqty Prezıdent ákimshiligimen birge qarastyramyz. Eger Prezıdent ákimshiliginiń sarapshylary men Úkimet tarapy belgili bir óńirge jeke týrıstik jarnany qoldaný múmkin bolatynyn aıtsa, biz qarsy bolmaımyz, - dedi Erjan Erkinbaev.
Eske salaıyq, QR Týrızm jáne sport mınıstriniń 2023 jyldyń 27 jeltoqsanyndaǵy № 347 buıryǵymen Qazaqstannyń búkil aýmaǵynda nóldik stavka bekitildi jáne 2024 jyly 21 aqpan kúni Almaty máslıhaty sheteldik týrıster úshin jarna qunyn 0 teńgege ózgertti.
Odan keıin Almaty qalasynyń máslıhaty QR Týrızm jáne sport mınıstrligine týrıstik jarnanyń stavkalaryn óz betinshe bekitýge quzyrettilik berý týraly usynys joldaǵan bolatyn.