Sheteldik týrıster Qyrǵyzstan parlamentine bara alady
ASTANA. KAZINFORM — Qyrǵyzstannyń Jogorký Keneshi sheteldik týrıster úshin aptasyna bir ret ashyq bolady. Qonaqtar parlament ǵımaratymen tanysa alady, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan Jogorký Keneshiniń baspasóz qyzmetiniń málimetinshe, ekskýrsııa barysynda týrısterge mýzeı men májilis zaldaryn aralap kórýge múmkindik beriledi. Mundaı ekskýrsııalar belgilengen tártippen aptasyna bir ret ótkiziledi.
— Ekskýrsııa uıymdastyrý Jogorký Keneshtiń qyzmetimen jaqynyraq tanysýǵa múmkindik berip, sheteldik qonaqtardyń Qyrǵyz Respýblıkasyndaǵy negizgi memlekettik bılik organdarynyń biri — parlament týraly keńirek túsinik alýyna jol ashady. Sonymen qatar kelýshiler arnaıy kádesyı buryshynan estelik ónimder satyp ala alady, — delingen habarlamada.
Qyrǵyzstan azamattary belgilengen talaptar men kelý tártibin saqtaǵan jaǵdaıda Jogorký Keneshke aptanyń bes jumys kúninde de kele alady.
Buǵan deıin elde týrısterdi mindetti saqtandyrý erejeleri bekitilgeni habarlanǵan bolatyn.
